Эрүүгийн хуульд нэмэлт, өөрчлөлт оруулах тухай хуулийн төслийг боловсруулсан талаараа УИХ-ын гишүүн Х.Болормаа өөрийн хуудсандаа ийнхүү нийтэлжээ. 

Тэрбээр "Миний бие нь УИХ-ын гишүүний хууль санаачлах бүрэн эрхийнхээ хүрээнд нийгэмд ноцтой асуудал болоод байгаа хар тамхи, мансууруулах бодис, сэтгэцэд нөлөөт бодисын хууль бус эргэлттэй холбоотой гэмт хэргээс хүүхэд, залуусыг хамгаалах, энэ төрлийн гэмт хэрэгт хүүхдийг хохирогч болгосон бол, хүүхдийг мансуурах байдалд татан оруулсан бол хүлээлгэх эрүүгийн хариуцлагыг чангатгах зорилготой хуулийн төсөл санаачиллаа.

Монгол улсад хар тамхи, мансууруулах эм, сэтгэцэд нөлөөт бодисын хууль бус эргэлттэй холбоотой гэмт хэргийн нөхцөл байдал сүүлийн жилүүдэд хүндэрч, энэ төрлийн гэмт хэргийн тоо эрс нэмэгдэж, ялангуяа өсвөр насны хүүхэд, залуус холбогдох байдал ихсэж байна.

Энэ байдал нь эх хүн, эмэгтэй хүний хувьд миний сэтгэлийг тун их эмзэглүүлж байгаа тул ирээдүй хойч үеийг хамгаалах, хүн амын удмын санд учрах сөрөг нөлөөллийг бууруулах үүднээс цаг алдалгүй хуулийн зохицуулалтыг чангатгах шаардлагатай гэж үзсэн болно.

Иймд Эрүүгийн хуульд заасан хүүхдийг мансуурах байдалд татан оруулах, энэ төрлийн гэмт хэрэгт хүүхдийг хохирогч болгосон бол оногдуулах эрүүгийн хариуцлагыг тодорхой болгож, чангатгах зорилгоор Эрүүгийн хуульд нэмэлт, өөрчлөлт оруулах тухай хуулийн төслийг боловсруулсан юм.

Хуулийн төслийг боловсруулах явцад мэргэжлийн байгууллагуудаас олон тооны судалгаа, мэдээлэл авч дүн шинжилгээ хийсэн бөгөөд сэтгэл эмзэглүүлэм тоо баримтууд ирж байгаа тул эрүүгийн хуульд нэмэлт, өөрчлөлт оруулахаас гадна Мансууруулах эм, сэтгэцэд нөлөөт бодисын эргэлтэд хяналт тавих тухай хууль эрх зүйн орчныг эргэж харах, нэн даруй шинэчлэх шаардлагатай нь тодорхой болж байна.

Иймд УИХ-ын гишүүн О.Амгаланбаатарын санаачилсан Мансууруулах эм, сэтгэцэд нөлөөт бодисын эргэлтэд хяналт тавих тухай хуулийн шинэчилсэн найруулгын төслийг боловсруулахад саналаа нэгтгэн ажиллаж байгааг энэ дашрамд мөн дурдахыг хүслээ" гэжээ.