Болзооны аппликейшнүүд хайр дурлалаа олох тал дээр хувьсгал хийсэн ч өнөөдөр олон хэрэглэгчийн хувьд эсрэгээрээ сэтгэл зүйн дарамт, ядаргааны эх үүсвэр болоод байна. Эцэс төгсгөлгүй "баруун, зүүн тийш шудрах" үйлдэл, хариу ирэхгүй харилцаа, гэнэт холбоогоо таслах буюу "ghosting" зэрэг нь хүмүүсийг цахим болзооноос залхааж, бодит орчинд танилцах арга хэмжээнүүд эргэн сэргэхэд хүргэжээ.

Сүүлийн жилүүдэд АНУ болон Европын олон хотод ганц бие хүмүүсийн уулзалт, түргэн болзоо (speed dating), сонирхлын клуб, хамтын гүйлт, номын клуб зэрэг арга хэмжээнд оролцогчдын тоо эрс өсөж байна. Хүмүүс дэлгэцээр бус, нүүр тулан ярилцаж, бодит харилцаа үүсгэхийг илүүд үзэх болсон нь энэ өөрчлөлтийн гол шалтгаан гэж судлаачид үзэж байна.

Сэтгэл судлаачдын тайлбарласнаар "dating app burnout" буюу болзооны аппын ядаргаа нь олон хүнийг хамарч буй бодит үзэгдэл болжээ. Аризона мужийн их сургуулийн судалгаагаар аппликейшнийг удаан хугацаанд ашиглах тусам хэрэглэгчдийн сэтгэл хөдлөлийн ядаргаа, үр дүнгүй мэт мэдрэмж нэмэгддэг бөгөөд ялангуяа ганцаардал, түгшүүр, сэтгэл гутралтай хүмүүс илүү эмзэг байдаг аж.

Мөн "Forbes Health"-ийн судалгаагаар болзооны апп ашигладаг хүмүүсийн 78 хувь нь ямар нэг хэмжээгээр "аппын ядаргаа" мэдэрсэн гэж хариулжээ. Үүнд хариу өгөхгүй алга болох (ghosting), хуурамч мэдээлэлтэй профайл, олон хүнтэй зэрэг харилцах дарамт, өөрийгөө байнга бусадтай харьцуулах зэрэг нь хамгийн түгээмэл шалтгаан болсон байна.

Энэ хандлага болзооны апп хөгжүүлэгч компаниудад ч нөлөөлж эхэлжээ. Tinder зэрэг томоохон платформууд хэрэглэгчдээ хадгалахын тулд хиймэл оюун ухаанд суурилсан шинэ боломжууд туршиж, хязгааргүй шудрахын оронд илүү цөөн боловч тохирох хүмүүсийг санал болгох систем нэвтрүүлэхээр ажиллаж байна. Түүнчлэн бодит уулзалт, арга хэмжээг дэмжих шинэ үйлчилгээ хөгжүүлэхэд анхаарч эхэлжээ.

Судлаачдын үзэж буйгаар технологи хайр дурлалыг орлохгүй. Харин зөв ашиглаж чадвал танилцах боломжийг нэмэгдүүлнэ. Гэхдээ олон хүний хувьд жинхэнэ харилцаа нь дэлгэцийн цаана бус, бодит уулзалт, хамтын туршлагаас эхэлдэг гэсэн ойлголт дахин хүчээ авч байна.

Л.Баяр