Их Британид трансжендер хүмүүсийн нийтийн орон зай ашиглах эрхтэй холбоотой маргаан дагуулсан шинэ журам хэрэгжиж эхэллээ. Журамд эмэгтэй, эрэгтэй гэж тусгайлан ангилсан ариун цэврийн өрөө, хувцас солих өрөө, эмнэлгийн тасаг зэрэг газруудад трансжендер хүмүүсийг оруулахгүй байхаар тусгажээ.
Энэхүү өөрчлөлт нь Их Британийн Дээд шүүхийн 2025 оны шийдвэрийн дараа гарсан байна. Тус шийдвэрээр “эмэгтэй”, “эрэгтэй”, “хүйс” гэсэн ойлголтыг Тэгш байдлын тухай хуульд биологийн хүйсээр тайлбарлана гэж үзсэн юм. Үүний дараа Хүний эрх, тэгш байдлын комисс (EHRC) байгууллагууд хууль хэрэгжүүлэх талаар шинэ заавар боловсруулжээ.
Шинэ журамд байгууллагууд тодорхой нөхцөлд трансжендер хүмүүсийг зөвхөн нэг хүйст зориулсан орчноос хасах боломжтой гэж заасан байна. Үүнд нийтийн ариун цэврийн өрөө, хувцас солих өрөө, эмнэлгийн тусгай тасаг, хамгаалах байр зэрэг багтаж байгаа аж.
Уг өөрчлөлтийг эмэгтэйчүүдийн хувийн орон зай, аюулгүй байдлыг хамгаалах зорилготой гэж тайлбарлаж байна. Харин трансжендер хүмүүсийн эрхийг хамгаалагчид энэ шийдвэр нь ялгаварлан гадуурхалтыг нэмэгдүүлж, олон нийтийн амьдралд оролцоход нь саад болно гэж шүүмжилжээ.
Шинэ удирдамж хэрэгжсэнээр Их Британи даяар олон мянган нийтийн байгууламж дүрэм, тэмдэглэгээгээ шинэчлэх шаардлагатай болж байна. Зарим байгууллагууд бүх хүнд зориулсан тусдаа, ганцаарчилсан ариун цэврийн өрөө бий болгох замаар асуудлыг шийдэхээр ажиллаж байгаа юм.
Энэ асуудал нь Их Британид сүүлийн жилүүдэд өрнөж буй хүйсийн тодорхойлолт, эмэгтэйчүүдийн эрх, трансжендер хүмүүсийн тэгш эрхийн талаарх улс төр, нийгмийн хамгийн том маргаануудын нэг хэвээр байна.
Л.Баяр
