Үсний индүү гартаа оруулахад тийм ч амар эд биш гэдгийг бид бүгд мэднэ. Магадгүй дараах алдаануудаас болоод л чиний үс нэг л болж өгөхгүй байгаа байх.

1. Хамгаалах цацлага хэрэглэхгүй байх
Үсэндээ “халуун төмөр” хүргэхээсээ өмнө заавал хамгаалах цацлага түрхэж байгаарай. Энэ бол нарны тосыг үргэлж хэрэглэдэг шиг л зайлшгүй зүйл юм шүү. Хамгаалагч цацлага нь үсийг чинь эмзэгшиж, хугарамтгай болохоос хамгаалдаг.

2. Зөв хэмжээтэй индүүгээ сонгохгүй байх
Ямар дүр төрхийг бүтээхийг хүсч байгаагаасаа шалтгаалан индүүнийхээ хэмжээг сонгох хэрэгтэй. Үс чинь богинохон эсвэл чи жижиг олон долгиог хүсч байгаа бол 1 инчийн (2.54см) диаметртэй индүүг сонгоорой. Харин чи урт үстэй эсвэл том сул долгионыг хүсч байгаа бол 1.5 ба түүнээс дээш инчтэй индүүг сонгох хэрэгтэй.

3. Хэт том багц үсийг нэг дор буржийлгах гэж оролдох
Атга дүүрэн багц үсийг нэг дор буржийлгавал хагас дутуу ороогдох болно. Хэрвээ чи өтгөн үстэй бол аль болох олон хэсэгт хувааж байгаад бага багаар нь буржийлгаарай. Эхлээд үснийхээ орой хэсгийг тэр чигт нь дээшээ хавчиж байгаад доод хэсгийг буржийлга. Дараа нь бага багаар дээш хавчсан хэсгээсээ буулгаж ороовол нэг ч үс шулуунаараа үлдэхгүй.

4. Индүүгээ хэт их халаах
Нарийхан, хугарамтгай үсийг хамгийн бага халуунаар нь ч ороож болно. Мөн үсийг хангалттай орооход 5-10 секунд л хангалттай байдаг. Үүнээс удаавал үс гэмтэж, эрүүл бус, арчилгаагүй харагдах болно.

5. Буруу тал руу нь ороох
Нүүрнийхээ хэлбэрийг зөв гаргахын тулд урд талын үсийг ороохдоо индүүгээ үргэлж арагш нь чиглэлтэйгээр эргүүлэх ёстой. Өөрөөр хэлбэл, баруун гар талынхаа үсийг баруун тийш нь, зүүн гар талынхаа үсийг зүүн тийш нь ороогоорой. Ингэвэл ороосон үс урагшаа орж ирээд, саад болоод байхгүй.

6. Чийгтэй үсийг ороох гэж оролдох
Ойлгомжтой санагдаж магадгүй ч жаахан ч гэсэн чийгтэй үсийг орооход гэмтэх хувь нь 50-иар ихэсдэг. Тэглээ ч шууд угаасан үсийг ороохоос илүү нэг хоносон үс хэвээ удаан барьдаг. Гэхдээ тослогтсон үсэнд бүү туршаарай.

Бонус зөвлөгөө: Хэрвээ чи нямбай, удаан тогтоцтой буржгар үсийг хүсч байвал үснийхээ хэсэг бүрийг индүүгээр ороочихоод хуруугаараа ахин чиглэлийнх нь дагуу мушгиж хөртөл нь байлгах юм уу дээш нь хавчиж тогтоогоорой. Харин хэрвээ сул долгиотой, төрөлхийн юм шиг буржгар үсийг хүсч байвал бүх хэсгээ нэг бүрчлэн ороочихоод хөрснийх нь дараа гүдгэр, том шүдтэй, модон самаар самна. Хөрөөгүй байхад нь самначихвал үс чинь буцаад шулуун болно гэдгийг анхаараарай. Эмх замбараагүй, уснаас дөнгөж гарч ирсэн юм шиг долгиог хүсч байвал самны оронд хуруугаараа султгах хэрэгтэй. Хамгийн сүүлд хийсэн хичээл зүтгэлээ “түгжиж” үсний спрей цацаарай.