Болор цом” болдогоороо болж яруу найрагч Б.Мягмаржав “Болор цом”-ын эзэн хүртэж нутаг нугийнхаа дэмжлэгээр “Болор цом” хүртдэг гэх олны хардлагыг үгүй болохыг батлан харуулсан үйл явдал болов. Ардын уран зохиолчдын түүхэн нутагт болсон энэхүү Болорцомд сэтгүүлч, зохиолч Б.Ойдовын Зохиолчдын хорооны туулсан замнал хэмээх элэглэл олны анхаарлыг татаж, гэнэтийн нэгэн сюрприз болж чадсаныг жирийн үзэгчид төдийгүй яруу найргийн хүрээнийхэн өндрөөр үнэлж байсан юм. Б.Ойдов Өвөрхангайн Хужирт сумын уугуул бөгөөд өнгөрсөн жилийн Болорцом наадмаар яруу найргийн манлайд яваа нэр хүндтэй олон яруу найрагчдийг уран чадварлагаар элэглэсэн нь үзэгч олонд төдийгүй тухайн элэглэлд багтсан олон эрхмүүдээс онц үнэлгээ авч байсан билээ.
Өнгөрсөн жил Б.Ойдов олон яруу найрагчдад тус бүрд нь элэглэл зохиож байсан бол энэ жил тэрбээр 80 жилийн түүхтэй Монголын Зохиолчдын эвлэлийн хялбаршуулсан түүхийг хоёрхон хуудсанд багтаан егөөдөж, үзэгчдийн таашаалыг дахин хүртсэн юм. Тиймээс энэ жилийн “Болор цом”-ын гэнэтийн нэгэн сюрприз бол “Зохиолчдын хорооны туулсан замнал” байлаа гэж ярих хүн олон байлаа. Ингээд Б.Ойдовын уншсан элэглэлийг толилуулъя.

ЗОХИОЛЧДЫН ХОРООНЫ ТУУЛСАН ЗАМНАЛ

Лодойдамба Гаадамбыг өөлөөгүй байхад
Лочин Ренчинг ноолоогүй байхад
Лодонгийн Түдэвийг цоороогүй байхад
Ломбыг үзгээ шүүрээгүй байхад

Ядмааг санхүү бариагүй байхад
Явууг намын үүр болоогүй байхад
Сэнгийн Эрдэнийг сэвээгүй байхад
Сэнгээг хороонд дэвээгүй байхад

Дуламыг зан үйл судлаагүй байхад
Дулмааг Жамсранжавтай “суугаагүй” байхад
Дуунд “Хар” Дагвадоржийг мөнхрөөгүй байхад
Дуг.Доржийг “Шаг” Дорж мөргөөгүй байхад

Дооровыг огт хагараагүй байхад
Доржготовыг шогт илрээгүй байхад
Догмидыг Дорноговьд балраагүй байхад
Дожоодоржийг харь гариг руу зэлрээгүй байхад

Тэрслүү Чойномыг гулраагүй байхад
Тэмээчнээр Галсанг шилрээгүй байхад
Цэдэвийг хороонд ирээгүй байхад
Цэрэнжамцыг хоршоонд идээгүй байхад

Умдаанд Гайтавыг унаагүй байхад
“Улаан” Долдыг сунаагүй байхад
Урианхайг дэл тавиагүй байхад
Удвалыг дээшээ дэвшээгүй байхад

Энэ Зохиолчдын хороо
Эвтэй найртай байжээ

Наваансүрэнг орлогчоор залж байхад
Нацагдоржууд хороонд шавж байхад
Цэдэндамбааг радио хөөж байхад
Цэдэндоржийг хороо тууж байхад

Гүрбазарыг телевизэд асч байхад
Гүрсэдийг “Тоншуул”-д хусч байхад
Гүрренчинг Дарханд тэсч байхад
Гүррагчааг сансарт нисч байхад

Барамсайг “главлит” шантаажилж байхад
Бадарчийг ансанбальд шалиглаж байхад
Бавуугийн Лхагвасүрэнг шатаж байхад
“Банхар” Пүрэвсүрэнг шартаж байхад

Барнангийн Доржпаламыг ноцож байхад
Банзрагчийг “Болор цом”-д эцэж байхад
Балбарыг улс төр лүү мацаж байхад
Балдоржийг Шүрээ рүү гэтэж байхад

Энэ Зохиолчдын хороо
Эвдрэх тийшээ ханджээ

Дэндэвийн Пүрэвдоржийг дэвшиж байхад
Дэргэдийн нөхдийг нь завшиж байхад
“Дэлт” Чимэддоржийг дэвэж байхад
“Дээлт” Алтангэрэлийг саваж байхад

Зундуйн Доржийг догширч байхад
“Зуудаг” Доржийг архирч байхад
Зуун айлд Заныг зутарч байхад
Зуун граммд Уянгыг задарч байхад

Цоодолыг дуулиар амьсгалж байхад
Чойномыг дуулианаар амьдруулж байхад
Цом руу Ичинхорлоог тэмүүлж байхад
Цол руу Сампилдэндэвийг тэшүүлж байхад

“Цог”-ийг Зандраа эрхэлж байхад
Цогтыг хүүхэн эргүүлж байхад
Цолмонг Энхбаяр эрхлүүлж байхад
Цооцоог Сүрэнжав элдэж байхад

Энэ Зохиолчдын хороо
Эвсэл болон задарчээ

Ай.Төмөр-Очирыг агсарч байхад
Арагваан Гэрэлийг хагсарч байхад
Архинд Батбаатарыг нэвширч байхад
Ахмад зохиолчдыг хөгширч байхад

“Эрүү” Баярааг хөзөрдөж байхад
Энхбаярыг хуулийнхан гүжирдэж байхад
Энхбатыг телевизүүд таталцаж байхад
Ишхүүг архинаас татгалзаж байхад

Романаар Цэнджавыг оролдож байхад
Ордонд Одончимэдийг хуралдаж байхад
Егөөдлөөр Сарантуяаг гижигдэж байхад
Ертөнцөд Мэнд-Ооёог танигдаж байхад

Норовын Гантулгыг гаарч байхад
Монхор Билэгсайханыг цайрч байхад
Модернист Галсааг цоорч байхад
Моломжамцыг “Болор цом” шүүрч байхад

Чойсүрэнгийн Дагвадоржийг цайлж байхад
Цогдоржийн Бавуудоржийг яйлж байхад
Цоодолын Хуланг цойлж байхад
“Чоно”-ын Жамъянг дүүлж байхад

Дамбын Төрбатыг жаалж байхад
Даргалагч Буянзаяаг дийлж байхад
Дархад Мийгааг бөөлж байхад
Дарга Мөнхцэцэгийг туйлж байхад

Энэ зохиолчдын хороо

Эргээд хэвэндээ оржээ