Монголын үндэсний  бөхийн холбооноос өнгөрсөн жилийн улсын баяр наадамд шөвгийн 16-д шалгарсан бөхчүүдээс допинг буюу сэргээшийн шинжилгээ авч улсын начин Б.Суманчулуун, Н.Адъяабат нарыг допингийн төрлийн бодис хэрэглэсэн болохыг илрүүлсэн.

         Допингийн эсрэг үндэсний төвд БНСУ-ын итгэмжлэгдсэн лабораториос ирсэн хариуг үндэслэн Монгол Улсын Ерөнхийлөгчид хоёр бөхийн улсын наадамд тав давсан давааг хүчингүй болгох тогтоол хүргүүлээд байсан. Ингээд хоёрдугаар сарын 18-ны өдөр Монгол Улсын Ерөнхийлөгч  сэргээш хэрэглэсэн нь итгэмжлэгдсэн лабораториор тогтоогдсон тул шинээр хүртсэн улсын начин цолыг хураах зарлиг гаргасан. Уг нь, дүрмэндээ допинг хэрэглэсэн бөхийн цолыг хасч, барилдах эрхийг ч давхар хасах тухай заасан байдаг ч залуу бөхчүүдэд боломж олгох үүднээс ийнхүү цол хураагаад л өнгөрчээ.