УИХ-ын гишүүн С.Оюун Дэлхийн Усны Түншлэлийн Удирдах Зөвлөлийн даргаар сонгогджээ. Тэрбээр ирэх сарын 1-нээс эхлэн ажлаа хүлээн авах юм байна.

С.Оюун Удирдах Зөвлөлийн даргаар сонгогдсонд баяртай буйгаа  илэрхийлээд “Усны нөөцийн асуудал дэлхий дахинд асар чухал болсон энэ үед усны томоохон байгууллагын Удирдах Зөвлөлийг даргалах нь хариуцлагатай үүрэг бөгөөд тулгамдсан асуудлуудыг шийдвэрлэхэд хувь нэмрээ оруулж хамтран ажиллах болно” гэж хэллээ.

Дэлхийн Усны Түншлэл нь усны нөөцийн хэрэглээ, менежмент, тогтвортой хөгжлийн асуудлыг шийдвэрлэх зорилготой 174 орны 3000 гаруй Түншлэгч байгууллагын ашгийн бус үйл ажиллагааны сүлжээ юм.