УИХ-ыг тараах АН-ын тогтоолд Ж.Бат-Эрдэнэ гарын үсэг зурсантай холбогдуулан дараах тодруулгыг авлаа.

-УИХ-ыг тараах тогтоолд яагаад гарын үсэг зурсан юм бэ?

-УИХ-ын гишүүн Ж.Мөнхбат албан бичигтээ УИХ-ыг тараах санал гаргаж байсан. Үүнд би гарын үсэг зурна гэдгээ хэлж байсан. Мөн зурсан гэдгээ ч хэлсэн. Та бүхэн мэдэж байгаа. Сүүлийн үед улс төр гарцгүй байдал руу орчихлоо. Ард иргэдийн итгэх итгэл нь байхгүй болоод байна. Улстөрчид улс орныг авч явдгийнхаа хувьд буцаад ард түмэн дээрээ очиж дүнгээ тавиулах шүүлтүүрээр шүүгдээд гарвал яасан юм. Нэг хэсэг нь шударгын туйл, нөгөө хэсэг бузар булайн туйл болчихоод байна. Шударга юм уу, гэхээр тэр нь харагдахгүй юм. Нөгөө ард түмэнд очих байсан ЖДҮ-г түүгээд авчихсан байх юм. Эрх мэдлээрээ дулдуйдаж ард түмэнд очих байсан зээлийг авчихсан. Сүүлийн үед мафижсан төр гэдэг зүйл рүү орж байна. Үнэхээр мафижсан төр юм бол Хуул зүй, дотоод хэргин сайд, Ерөнхий сайд юу хийж байгаам юм бэ. Яагаад учрыг нь олж чадахгүй байгаа юм. Сая уул уурхайн ордод нэлээд том ажиллагаа явуулах шиг боллоо. Татвараа авч чадахгүй байгаа юм бол төр ажлаа хийж чадахгүй байна. Тэгвэл Сангийнхаа сайдтай учраа ол. Хуулийнхаа асуудлыг хангаж чадахгүй байгаа бол Хууль зүй, дотоод хэргийн сайдтайгаа учраа ол. Бид сайд, засаг, төр л гэж байна. Гэтэл хуулийнхаа дагуу асуудлаа шийдээд тухайн сандал дээр суусан бол ажлаа хийсэн шиг хийгээд явах хэрэгтэй. Хэн чанга дуугарч чадсан нь, хэн шударга бус үйлдлийг нэгэндээ нялзааж чадсан нь дээшээ гардаг ийм байдал байж болохгүй. Энэ шинэчиллийн алхам дээр, ард түмэнд очсон энэ мэдээлэл дээр дахин ард түмэндээ очин шүүлтүүрээр ороод гараад ирвэл яасан юм бэ гэдэг санал гаргаж байна.

-Та улс төрийн байдал гарцгүй боллоо гэлээ. МАН-д ард түмэг 65 суудал өгсөн. Та бүхэн олонхи байж улс төрийг гацаа гэгдээд байгаа зүйлээс нь гаргаж цааш явж болдоггүй юм уу?

- Яагаад МАН 65-уулаа байж улс орныг жолоодож явах бололцоо байхад дотроо хагарсан нь ердөөсөө л эрх мэдлийн төлөөх тэмцлээс үүдэлтэй. Хэрэв Ерөнхий сайд болохгүй байгаа өол түүнийг шүүж байсан газарт нь очоод шүүлгээдэх. Хоёрдугаарт, нэг нам гээд явж байгаа тохиолдолд асуудал гарвал нам дотроо яръя л даа. Тэрийг яагаад улс төр рүү нялзаах ёстой юм бэ гэж хэлээд л кноп дарсан. Нэг талдаа гараад явчихлаа шүү дээ. Тэгэхээр бүлэг дээр байгаа зөвшилцөлд бид очих ёстой юм. Үйл ажиллагаа цэвэр байхын нэг үндэс нь улс төрийн нам цэвэр байх. Улс төрийн нам цэвэр байна гэдэг нь орж ирж байгаа гишүүр ч гэсэн цэвэр байна. Намын дотоод асуудал цэвэр байж, ил тод байх ёстой. Сонгон шалгаруулалтын босго ч зөв байх ёстой.

-УИХ-ыг тараах тухай хоёр албан бичиг байна. Энэ хоёр нийлээд хүчинтэй болох юм уу, эсвэл тусдаа хүчинтэй юм уу?

-Ж.Мөнхбат гишүүний саналыг дэмжиж байгаа. АН-аас гаргасан тогтоолыг ч дэмжиж байгаа. Ард түмэн одоо боль гээд байхад хүчээр гүрийгээд яваад байх юм уу, эсвэл дүнгээ тавиалаад хүрээд ирэх юм уу гэх асуудал яригдаж байна.

-ЖДҮ-ээс зээл авсан дөрвөн гишүүний эрхийг түдгэлзүүлэх шаардлагагүй гэж Халдашгүй байдлын байнгын хороогоор үзсэн. Үүнд та ямар байр суурьтай байна вэ?

-Би 2016 онд сонгуульд орохдоо ЖДҮ-ийн асуудлыг ярьж орсон. Дөрвөн жилийн дараа очихдоо нэг байшин будсан, нэг дотуур байр зассан, нэг эмнэлэгт засвар хийсэн, зам зассан гэх асуудлыг яриад очмооргүй байна. Харин ард түмний амьжиргааг яаж дээшлүүлсэн талаар ярих ёстой. Нийгмийн үйлчилгээг яаж шийдсэн, ЖДҮ-ийг бий болгож чадсан уу, ажлын байр нэмэгдүүлэв үү гэх хэмжигдэхүүнээр хэмждэг болъё л доо. ЖДҮ-ийн зорилго нь ядуурлыг бууруулах байхгүй юу.

Б.Лхам