Энэ жил УИХ-д уул уурхайн бизнесийн салбараас цөөнгүй гишүүн сонгогдсон. “Мон Уран”-ы Б.Наранхүү, “МАК”-ын Н.Номтойбаяр зэрэг шинэ хөрөнгөтнүүдээс гадна хуучны архаг бизнесмэнүүд парламентад орж ирсэн. АН, ИЗНН, “Шударга ёс” эвслийн  гишүүд бүгд л Н.Алтанхуягийн Засгийн газарт сайдын суудал зулгаах хүсэлтэй  байсан ч нам доторхи “Алтан гадас”, “Шонхор”, МоАХ зэрэг фракциуд нь наймаа, тохироогоор хувааж авч байна. Тиймээс фракцийн гадна үлдэж, бялуунаас  хүртэж чадаагүй гишүүд өөрсдөө фракци байгуулах хэрэгтэй юм байна гэдгийг ойлгосон бололтой. Тухайлбал, Дундговь аймгаас сонгогдсон “Мон-Уран” компаний захирал Б.Наранхүү, Өмнөговь аймгаас сонгогдсон “Ажнай” группийн захирал Д.Бат-Эрдэнэ нар шинэ фракци байгуулахаар гишүүдтэй уулзаж эхэлжээ. Тэд ойрын өдрүүдэд АН-ын гишүүдийг хоолонд урьж, дайлж цайлан шинэ фракцид орохыг санал болгож яваа гэнэ. Д.Бат-Эрдэнэ фракцийнхаа нэрийг өөрийн “Ажнай” группээр нэрлэе гэсэн ч хамтран зүтгэгч Б.Наранхүү нь зөвшөөрөөгүй аж. Тэрбээр хэрэв тэгэж нэрлэхдээ тулбал “Мон-Уран” компанийхаа нэрийг оролцуулж “Мон-Ажнай” гэсэн фракцитай болно гэжээ.

  Мөн энэ фракцид зөвхөн АН-ын гишүүд ч биш говь нутгаас сонгогдсон гишүүдийг элсүүлэх бодолтой байгаа аж. Тиймээс фракцидаа “Мон-Ажнай”-гаас гадна “Говь” гэсэн нэр өгч болох талаар ч ярилцжээ. Өөрөөр хэлбэл Б.Наранхүү, Д.Бат-Эрдэнэ нар парламентад “нам дамжсан” фракци гэгч шинэ үзэгдлийг бий болгохоор зүтгэж эхэлсэн байна. Тэд улс төрд нам, намд фракци, бүлэглэл ямар хэрэгтэйг энэ Засгийн газрын хуваарилалтаас ухаарсан тухайгаа ярьжээ.

  Б.Наранхүүгийн хувьд 2012 оны сонгуульд МАН-аас нэр дэвшинэ гэж байсан ч эцсийн мөчид АН-аас ганц мандаттай Дундговь аймгаас цойлж гарч ирсэн. Түүнийг АН-аас нэр дэвшихийн тулд дөрвөн тэрбум төгрөг хандивласан гэх яриа байдаг. Бүр тодруулбал, АН доторх “Нэг ардчилал” болон “Шонхор” фракциудад тус бүр нэг тэрбум төгрөг өгсөн гэж эх сурвалжууд хэлдэг. Мөн Буянт-Ухаагийн спорт цогцолборт болсон АН-ын УИХ-ын сонгуульд нэр дэвшигчдээ танилцуулах үйл ажиллагааг нэг тэрбумаар ивээн тэтгэсэн гэсэн яриа АН дотор тархаад байсан билээ.
Харин Д.Бат-Эрдэнэ бол өмнө нь УИХ-д дөрвөн жил суусан, Бага Таван толгойгоос Хятад руу нүүрс тээвэрлэдэг “Таван толгой транс” ХХК-ны захирал юм. Тэд  өмнө нь уул уурхайн салбарт хамтран ажиллаж байсан түншүүд. Харин одоо улс төрийн тогоонд ороод улам “зузаан” нөхөд болж байгаа нь энэ бололтой.