Эдийн засгийн байнгын хорооны дарга Д.Дамба-Очир өнөөдөр /2019.04.17/ “Рио Тинто” компанийн Харилцаа, хамтын ажиллагаа хариуцсан ерөнхийлөгч Симон Нивенийг хүсэлтээр нь хүлээн авч уулзан, хамтын ажиллагааны талаар санал солилцов.
Уулзалтын эхэнд, “Рио Тинто” компанийн Харилцаа, хамтын ажиллагаа хариуцсан ерөнхийлөгч Симон Нивен “Оюутолгойн ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах” үүрэг бүхий УИХ-аас байгуулагдсан Ажлын хэсгийн Дубайн гэрээтэй холбоотой хийсэн мэдэгдэл нь “Рио Тинто” компанийн Төлөөлөн удирдах зөвлөлийн хуралтай давхцсаныг мэдээлээд, энэхүү Ажлын хэсгийн дүгнэлтийг УИХ-аар хэдийд хэлэлцэхийг тодрууллаа.
Хариуд нь Эдийн засгийн байнгын хорооны дарга Д.Дамба-Очир Хөрөнгө оруулалтын гэрээ, Хувь нийлүүлэгчдийн гэрээ, Дубайн гэрээ зэрэг гэрээнүүдэд өөрчлөлт оруулах, сайжруулах асуудал байгааг анхааруулаад, “Рио Тинто” компани цаашид хөрөнгө оруулалтаа үргэлжлүүлж, Оюутолгойн гүний уурхайн ажлыг дуусгах ёстой. Гүний уурхай ашиглалтад орсноор Оюутолгойн хүчин чадал нэмэгдэж, дагаад Монголын эдийн засагт хөгжил авчирна гэв.
Тэрбээр мөн, энэ дөрөвдүгээр сардаа багтаад “Оюутолгойн ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах” үүрэг бүхий Ажлын хэсгийн дүгнэлтийг Байнгын хороо болон чуулганы нэгдсэн хуралдаанаар нээлттэй хэлэлцээд, УИХ-ын тогтоолоор Засгийн газарт чиглэл өгөхөөр төлөвлөж байгаа талаар мэдээлэл өглөө.
С.Сүлд
Сэтгэгдэл (10)