ХХААХҮЯ-наас ЖДҮХС-гийн шинэчилсэн журам болон бэлтгэсэн махны нийлүүлэлтийн талаар мэдээлэл хийлээ.
Энэ үеэр сайд Ч.Улаан “ЖДҮХС-тай холбоотой олон алдаа дутагдал гарсан. Үүнийг арилгах ажлыг энэ хугацаанд хийлээ. ХХААХҮ-ийн сайдын тушаал гарч журмын дагуу Хууль зүй, дотоод хэргийн яамнаас зөвшөөрсний үндсэнд ЖДҮХС-гаас зээл олгох эрх зүйн зохицуулалтыг шийдсэн. Бид ойрын хугацаанд шинэчилсэн журмын дагуу ЖДҮХС-гаас зээл олгож эхэлнэ. Шинэ журмыг баталснаар хэд хэдэн зарчмын асуудал шийдэгдсэн. Тэр дундаа сангийн үйл ажиллагааг ил тод байлгах, олон түмний хяналтын дор, хууль дүрэм зөрчихгүйгээр явуулдаг байх чиглэлд журмын гол зорилго. Журамд дурдагдсан зарчмын тодорхой асуудлыг хэлье. ЖДҮХС-гаас дэмжлэг үзүүлэх төслийг хоёр шугамаар сонгож шалгаруулна. Нэгдүгээрт, арилжааны банк, ЖДҮХС-гаас зээлийг олгоно. Зээл олгох төслийг шалгаруулах нөхцөлийг ил тод олон нийтийн хяналтын дор хийх, хэвлэл мэдээллийн хэрэгслээр нээлттэй зарлаж хэрэгжүүлэхээр журамд тусгасан.
Сонгон шалгаруулахдаа олон улсын байгууллагын хэрэглэдэг арга аргачлалын дагуу нарийвчилсан үнэлгээг хийнэ. Үнэлгээ хийсний дагуу газар дээр нь магадлан хянах ажлыг хийнэ. Ингэж байж зээлийг олгоно. Зээл олгох шийдвэр гаргах субъектийг тодорхой болгож өгсөн. Зээл олгох хороо долоон хүний бүрэлдэхүүнтэй байна. Түүний дөрвөн гишүүн нь мэргэжлийн холбоод олон нийтийн төлөөлөл байх болно” гэлээ.
Мөн тэрбээр бэлтгэсэн махны нийлүүлэлтийн талаар “Хүчит шонхор” захад нийлүүлж байгаа махны нийлүүлэлтийг нэмэгдүүлэх, захиргааны шинжтэй гарсан саатлыг арилгах арга хэмжээг авлаа. Өнөөдрөөс нийлүүлэгдэж байгаа махны хэмжээ тодорхой хувиар нэмэгдэж байна. Манай яамны холбогдох албан тушаалтнууд бодит байдалтай нь танилцаж ажилласан.
Захуудад нийлүүлэгдэж байгаа махнаас дотоодод боловсруулах үйлдвэрүүд тэр дундаа дулааны аргаар мах боловсруулагдаж байгаа үйлдвэрүүд их хэмжээгээр авч байгаа нь махны хангамжид нөлөөлж байна гэсэн шүүмжлэл ард иргэдийн дунд их гарч байна. Тиймээс энэ байдлыг шалгаж, судалж үзсэн. Шалгалтаар технологийн шинжтэй алдаа, зөрчил дутагдал байна. Тэр дундаа дулааны аргаар мах боловсруулж байгаа үйлдвэрүүд хоёр улсын хооронд мах экспортлох албан ёсны тохиролцоо протоколын дагуу итгэмжлэгдсэн мах боловсруулах үйлдвэрээс мах бэлтгэж дулааны аргаар боловсруулж экспортод гаргах журамтай. Гэтэл энэ журам зөрчигдөж зах зээлээс махыг шууд боловсруулах үйлдвэр рүү нийлүүлсэн байна. үүнийг бид журам дүрмийн дагуу цэгцэлж зохицуулах болно” гэв.
Р.Хишигээ
