С.Зоригийн амь насыг хөнөөсөн хэргийг шийдвэрлэсэн асуудлаар Олон улсын парламентын холбооны удирдах зөвлөлөөс ирүүлсэн шийдвэрийг судалж, холбогдох санал, дүгнэлт боловсруулах үүрэг бүхий Түр хорооны гишүүд мэдээлэл хийлээ.

УИХ-ын гишүүн Ж.Батзандан "Т.Чимгээ, Д.Содномдаржаа нарыг суллахын тулд эрхзүйн гаргалгаа, гарцыг бид судалж байна. Эрүүгийн хэрэг хянан шийдвэрлэх тухай хуульд шинээр илэрсэн нөхцөл байдал гэсэн заалт бий. Шинээр илэрсэн нөхцөл байдлын хувьд гэрчээс мэдүүлэг авахдаа эрүүдэн шүүх замаар авсан, гэрчийн мэдүүлэг худал болох нь нотлогдсон, хэргийн ач холбогдол бүхий шинэ нотлох баримт илэрсэн тохиолдолд Улсын Дээд шүүх хяналтын журмаар, Дээд шүүхийн нийт шүүгчийн бүрэлдэхүүнээр хэргийг дахин авч хэлэлцэж шинээр илэрсэн байдлын улмаас мөрдөн байцаалтад буцаах боломж байна.

Гаргасан шийдвэрээ Улсын дээд шүүхийн хяналтын шатны шүүх хүчингүй болгох бололцоо байгаа тухай дээд шүүхийн Ерөнхий шүүгч болон прокурорын байгууллагын удирдах албан тушаалтнуудтай ярьж, судалж, эрх зүйн гаргалгаа гаргаж байна.

Хэлмэгдсэн иргэдийг суллах, цатгаатгах ажил хуулийн хүрээнд явах ёстой. Хуулийн гарц боломж байгаа гэдэгт бид бүрэн итгэлтэй байна" гэлээ.