Ерөнхий сайд У.Хүрэлсүх болон Засгийн газрын зарим гишүүн, нийслэлийн удирдлагууд өчигдөр Багануур дүүрэгт ажилласан билээ. Энэ хүрээнд Багануурын уурхайн үйл ажиллагаатай танилцсан юм. Энэ үеэр Уул уурхай, хүнд үйлдвэрийн сайд Д.Сумъяабазар Багануурын уурхайд шинэчлэл хийх талаар сэтгүүлчдэд мэдээлэл өгчээ.

Тэрбээр "Нүүрсээр Улаанбаатар хотыг эрчим хүчээр хангаж байгаа Багануурын уурхайд техникийн бүрэн шинэчлэл хийх цаг нь болсон. Олон улсын байгууллага болох Канад, Английн хөгжлийн агентлаг зэрэг байгууллагуудтай ярилцаж 500 саяас нэг тэрбум долларын зээлийг шийдэж өгөх хүсэлт тавиад явж байна. Англи, Канадын зүгээс зээл нээж өгөх боломжтой гэх хариуг өгсөн. Уг санхүүгийн асуудал ойрын хугацаанд шийдэгдвэл олон ажлыг хийнэ.

Цаашлаад уурхайг шинэчилж, нөөцийг нэмэгдүүлэн үйл ажиллагааг өргөжүүлэхээр зорьж байна. Жилд одоогийн байдлаар олборлодог дөрвөн тонн нүүрсийг долоон сая тоннд хүргэх бүрэн боломж бий гэж харж байна. Энэ боломжийг бий болгохын тулд яам санаачилгатай, идэвх зүтгэлтэй ажиллаж байгаа. Түүнчлэн ордын тусгай зөвшөөрлийн асуудлын тухайд хамгийн зөв хувилбарыг ярилцаж, ойрын хугацаанд шийднэ" гэсэн байна.

Засгийн газрын гишүүд Багануурт ажиллах үеэр Ерөнхий сайд У.Хүрэлсүх өвөлжилтийн бэлтгэлээ энэ сараас хангаж ажиллах ёстой. Лицензийн асуудлыг хэрхэхийг салбарын сайд шийдэж өгөөрэй гэлээ. Мөн санхүүгийн сахилга бат дээр анхаарч ажиллах ёстойг анхааруулсан юм. Мөн хуурамч бичиг баримт бүрдүүлж, хууль бусаар ажилд орсон асуудал яригадж байна. Сахилга бат, дэг журам тогтоож, үрэлгэн зардлаа танаж ашигт ажиллагаагаа дээшлүүлэхийг Ерөнхий сайд үүрэг болголоо.

С.Сүлд