О.Баасанхүү гишүүн УИХ дахь АН-ын зөвлөлд нэгдэх хүсэлтэй Д.Эрдэнэбатад хүргүүлжээ. Энэхүү шалтгаанаа “АН-ын зөвлөлтэй хамтран ажиллаж найман гишүүнтэй болох. Улмаар хүчтэй сөрөг хүчин болгоход хамтран ажиллая гэсэн агуулгатай. УИХ-ын тухай хуулийн 7.1 дэх заалтад “УИХ-ын гишүүн нь нам, эвслийн бүлэгт нэгдэж болно” гэсэн байдаг. Нам эвслийн бүлэгт нэгдсэнийг УИХ-ын дарга УИХ-ын чуулганы хуралдаанаар зарлах үүрэгтэй” гэж бий. Би МАХН-ын гишүүний хувьд намаасаа гарахгүй.

Харин МАХН-ын зүгээс АН-ын бүлгийг хүчтэй сөрөг хүчин болгоход нэгдэцгээе гэж уриалж байна.  УИХ-д Үндсэн хуулийг өргөн барьсан. Энэ тохиолдолд суудалгүй намын зүгээс Монгол Улсын Ерөнхийлөгчид хүсэлт хүргүүлсэн байна. Хүсэлтэд үндэсний зөвшилцөх зөвлөл байгуулъя гэсэн. Ингээд УИХ-д хүчтэй сөрөг хүчин гаргах ёстой гэж ойлгож болно” хэмээн тайлбарлав.

Үүнийг зарим нэгэн нь УИХ-д долоон суудалтай үлдсэн АН-ын зөвлөлд О.Баасанхүү нэгдсэнээр Бүлэгтэй болно хэмээн ярьж байгаа юм. Гэхдээ тийм биш. Учир нь, О.Баасанхүү гишүүн АН-ын зөвлөлд нэгдсэнээр тэд УИХ-д Бүлэгтэй болчихгүй. Хуульд ч энэ тухай тодорхой заажээ. Үүнд:

26.1. Улсын Их Хурлын сонгуулийн дүнгээр Улсын Их Хуралд 8-аас доошгүй суудал авсан нам, эвсэл бүлэг /цаашид “бүлэг” гэх/ байгуулж болно.

26.2. Бүлэгт зөвхөн тухайн нам, эвслээс нэр нь албан ёсоор нэр дэвшиж сонгогдсон гишүүд орно.

26.9. Бие даан нэр дэвшиж сонгогдсон болон ээлжит сонгуулиар 8-аас доош суудал авсан өөр нам, эвслийн төлөөлөл бүхий гишүүд нийлж нэг бүлэг байгуулахыг хориглоно гэжээ.

Эндээс О.Баасанхүү гишүүний хүсэлтийг Д.Эрдэнэбат дарга хүлээн авсан ч АН-ын зөвлөл Бүлэг байгуулах боломжгүйг харж болно. Нэг үгээр О.Баасанхүү гишүүнийг нэгтгэлээ гээд АН Бүлэгтэй болох нь хуулиар хаалттай юм. Тэгэхээр О.Баасанхүү гишүүний энэ удаагийн мэдэгдэл, хүсэлт нь зүгээр нэг хийрхэл болж таарах нь.

С.Сүлд