Ерөнхийлөгч Х.Баттулга анхан болон давж заалдах шатны ерөнхий шүүгч болон шүүгч нарт зарлиг гардууллаа. Тэрбээр, Та бүхэн хариуцлагатай цаг мөчид шүүгчээр томилогдож байгаагаа гүнээ ухамсарлах ёстой. Шүүхэд итгэх олон нийтийн итгэл алдарч, шүүх авлигад хамгийн ихээр өртсөн байгууллагаар нэрлэгдэх болсны улмаас шинэчлэх, өөрчлөхөөс аргагүйд хүрсэн билээ. Та бүхэн ард түмний сүүлчийн итгэл найдварыг тээж байгаагаа ухамсарлан хуулинд захирагдаж, зөвхөн хуулийг мөрдөж чин шударгаар ажиллах ёстой.

Үндсэн хуульд “Шүүгч хараат бус байж гагцхүү хуульд захирагдана” гэж заасныг хэлбэрэлтгүй сахиж, иргэдийн эрх, эрх чөлөөг хамгаалах, зөрчигдсөн эрхийг сэргээн тогтоох; шударга ёсыг бэхжүүлэх; хэрэг, маргааныг хянан шийдвэрлэхдээ голч, цэгц шударга байж гэмт хэрэг, зөрчлийг үнэн зөв шийдвэрлэх, урьдчилан сэргийлэх шүүхийн эрхэм зорилгыг алхам бүртээ санаж яваарай гэж захья.

Нийгэм олон нийт та бүхнийг өндөр албан тушаалтнуудын өдүүлсэн хээл хахууль, төрийн албан тушаалыг хувийн зорилгодоо ашигласан, орд газар болон албан тушаал наймаалцсан, төсвийн хөрөнгөөр их хэмжээний хэрэгцээгүй зүйл шахсан зэрэг шийдэгдэж өгдөггүй дуулиант хэргүүдийг хараат бусаар эцэслэн шийдвэрлэж чадах эсэхийг томилогдсон мөчөөс чинь эхлэн хөндлөнгөөс харж, шаардах болно.

Эрүүдэн шүүлт, сэжигтнүүдтэй хэрцгий, хүнлэг бусаар харьцсан тухай мэдээлэл тархаж, нийгэмд  шүүмжлэл өрнөж буй энэ цаг үед та бүхэн ажилдаа няхуур хандаж, мөрдөн байцаалтын болон шүүхийн шийдвэрийг биелүүлэх явцад хүний эрх зөрчигдөж байгаа эсэхийг байнга шалгаж байх шаардлага бас тулгарч байгаа юм.

Эрүү шүүлтээс ангид байх иргэдийн эрхийг хангах асуудал өнөөдрийн тулгамдсан асуудал болжээ. Хүний эрхийн Түгээмэл Тунхаглал, Иргэний болон улс төрийн эрхийн тухай олон улсын пакт, Эрүүдэн шүүх, хэрцгий, хүнлэг бусаар хүний нэр төрийг доромжлон харьцаж шийтгэхийн эсрэг конвенцийг манай улс дагаж мөрдөх үүрэг хүлээсэн байдаг. Шүүх засаглалын өдөр тутмын үйл ажиллагаанд мөрдлөг болгох учиртай Хүний Эрхийн Түгээмэл Тунхаглалд:

•“Хэнд ч эрүү шүүлт тулгах, хэрцгий, хүнлэг бусаар, нэр төрийг нь доромжлон харьцах буюу шийтгэхийг хориглоно”. /7-р зүйл/

•“Хэнийг ч дур мэдэн баривчлах буюу цагдан хорьж болохгүй. Хуульд заасан үндэслэл, журмаас гадуур хэний ч эрх чөлөөг хасч болохгүй”. /9-р зүйл 1 дэх хэсэг

•“Шүүхийн өмнө бүх хүн тэгш эрхтэй. Хүн бүр өөрт тулгасан эрүүгийн хэргийг… …хуулийн дагуу байгуулагдсан эрх бүхий хараат бус, тал үл харах шүүхээр нээлттэй, шударгаар шүүлгэх эрхтэй” /14-р зүйл 1 дэх хэсэг/ гэж заасныг хэрэгжүүлэх үүргийг хүлээж байгаа институци нь шүүх засаглал гэдгийг ямагт санаж ажиллаарай.

Та бүхэн цэгц шударгаар ажиллаж, шүүхийн нэр төрийг өндөрт өргөж байж ардчиллын тулгуур болсон Шүүх засаглалын хараат бус байдлыг хангаж, иргэдийн дэмжлэгийг татах болно. Нөгөө талаар шүүх засаглал руу улстөржсөн хэлбэрээр дайрч, “шүүхийн шийдвэр эцсийнх байна” хэмээх шударга шүүхийн тулгуур ойлголтуудыг эвдэх, бусниулахаар чармайж байгаа оролдлогуудыг Та бүхний зөв, шударга шийдвэрүүд л тас цохих болно. Гэмт хэрэгтэн хариуцлагаас мултарч болохгүй, хэн нэгнийг хилсээр шийтгэж болохгүй, хэрэг хүлээлгэхдээ эрүү шүүлт, тулган хүлээлгэлт, доромжлох дарамтлах асуудал гаргуулж болохгүй гэсэн үндсэн зарчмуудыг хэрэгжүүлчихбэл шүүхийн нэр төр, иргэдийн итгэл сэргэх нь дамжиггүй гэж би бодож байна” гэлээ.

С.Сүлд