БНКаУ-аас Монгол Улсад суугаа Онц бөгөөд Бүрэн эрхэт Элчин сайд К.Кобландин энэ сарын 11-ны өдөр тус улсад зохион байгуулагдсан Ерөнхийлөгчийн ээлжит бус сонгуулийн үр дүнгийн талаар мэдээлэл хийлээ.
Тэрбээр "Монгол Улсад түр оршин суудаг Бүгд найрамдах Казахстан Улсын сонгогчид 93.1 хувьтай сонгуульд оролцсон. БНКаУ-ын Сонгуулийн төв комиссийн албан ёсны эцсийн мэдээгээр одоогийн Ерөнхийлөгчийн албан тушаалд нэр дэвшигч Касым-Жомарт Токаев 70.96 хувийн санал, ойрын өрсөлдөгч нь Амиржан Косанов 16.23 хувийн санал авсан. Сонгуулийн төв комиссийн мэдээгээр сонгогчдын ирц 77.4 хувьд хүрсэн. К-Ж.Токаевыг ерөнхийлөгчийн сонгуульд "Нур Отан" намаас нэр дэвшсэн. Тус намын дарга нь Казахстаны анхны Ерөнхийлөгч Нурсултан Назарбаев юм" гэлээ.
Сонгуульд ялалт байгуулсан Токаев Касым-Жомар Кемелович нь 1953 оны тавдугаар 17-ны өдөр төржээ. Моска хотын Олон улсын сургуулийг 1975 онд, ОХУ-ын Гадаад хэргийн яамны дипломат академийг 1992 онд тус тус төгссөн. Үүнээс гадна бүгд Найрамдах Казахстан Улсын Гадаад хэргийн сайд, Ерөнхий сайдын үүргийг гүйцэтгэж байжээ. Хэвлэлийн хурлын үед БНКаУ-аас Монгол Улсад суугаа Онц бөгөөд Бүрэн эрхэт Элчин сайд К.Кобландин хоёр орны хоорон дахь худалдаа, эдийн засаг, тээвэр-ложистикийн салбарууд дах харилцааны хөгжилийн тухай санал бодлоо хуваалцсан юм.
-"Нур Отан" намаас нэр дэвшиж, ялалт байгуулсан Касым-Жомарт Токаевийн өрсөлдөгчийн талаар товч танилцуулахгүй юу. Хэр хүчтэй нэр өрсөлдөгч байсан гэж дүгнэж байна вэ?
-Өрсөлдөгч нь сэтгүүлч мэргэжилтэй. Сөрөг хүчинд 15-20 жилийн хугацаанд гишүүнчлэлтэй явж ирсэн, ард түмэнд танигдсан хүн гэж дүгнэж болно.
-Шинэ Ерөнхийлөгч хоёр улсын хамтын ажиллагаанд хэрхэн анхаарч ажиллахаар төлөвлөж байгаа бол. Та Казахстан Улсаас Монгол Улсад сууж байгаа Элчин сайдын хувьд энэ талаарх мэдээлэлтэй байгаа байх?
-Шинээр сонгогдсон Ерөнхийлөгчийн хувьд хоёр улсын хооронд нэлээн ажил өрнүүлэх болов уу. Учир нь шинээр сонгогдсон Ерөнхийлөгч Монгол Улсад хэд хэдэн удаа ирж байсан. Хамгийн сүүлд 2003 онд НҮБ-ийн Ерөнхий нарийн бичгийн орлогчийн хувьд Улаанбаатар хотод ирж байсан. Мөн Монголын аж амьдралыг сайн мэддэг хүн. Гадаад харилцааны бодлогод хоёр улсын тогтсон дипломат харилцаа, өөр хоорондоо ашигтай байх түншлэлийн зарчимд сөрөг өөрчлөлт орохгүй. Өмнө баримталж байсан бодлогоо баримтлаад явна.
Р.Хишигжаргал
