АН-ын ерөнхий нарийн бичгийн дарга Ц.Туваан жагсаал зохион байгуулах Ажлын хэсэг байгуулах тухай лүндэн буулгажээ. Энэ сарын 7-нд. Намын Үндсэн дүрмийн 5.19.4 дэх заалтыг үндэлсэн буулгасан түүний тушаалд хоёр зүйлийг үндэслэлээ болгосон байх. Эхнийх нь Хууль зүй, дотоод хэргийн яамны үйл ажиллагааны чиг үүрэгт хамаарах шүүх эрх мэдлийн, хууль сахиулах байгууллагын, хүний эрхийг хангах чиглэлээр хийж хэрэгжүүлж буй нэгдсэн бодлого, түүний хэрэгжилт хангалтгүй байгааг эсэргүүцэж энэ сарын 10-14-ны хооронд зохион байгуулах жагсаал, цуглааны ажлын хэсгийн бүрэлдэхүүнийг хавсралт ёсоор баталсугай.

Удаах нь уг тушаалтын хэрэгжилтэд хяналт тавьж, удирдлага зохион байгуулалтаар хангаж ажиллахыг Хэрэг эрхлэх газрын дарга Д.Мэндбаярт үүрэг болгосугай гэжээ.

Сонирхолтой нь, АН-ын генсекийн энэхүү тушаал гарахтай зэрэгцэн намынх нь гишүүд түрүүчээсээ гайхах, эгдүүцэх нь зэрэгцэж эхэлжээ. Тэгэх нь ч аргагүй юм.  

Цагтаа үг хэлэх, үзэл бодлоо чөлөөтэй илэрхийлэх эрхээ эдэлж, хэн нэгний тушаал, шаардлага байтугай хэнээр ч заалгахгүйгээр, өөрсдийн санаачилгаар тэмцэж ирсэн АН-ын гишүүдийг албадан жагсаал, цуглаанд оролцуулах лүндэнг Ц.Туваан дарга буулгасан нь тийм ч таатай санагдаагүй, хүлээж аваагүй нь лав. Эсрэгээрээ дотоод ардчилал нь олон нийтэд ил явж ирсэн энэ намын үйл ажиллагаанд удирдлагын хэмжээнд хэт цензур тогтоож эхэлснийг илтгэх мэт.

Адаглаад Засгийн газар, УИХ-ын зарим нэг алдаатай, хуудуутай шийдвэрийг сөрж зогсож чадахгүйгээр барахгүй парламентад Бүлэггүй болтлоо нэр хүнд нь унасан АН-ын удирдлагын зүгээс жирийн гишүүддээ жагсаалд оролцох тушаал буулгасан нь инээдтэй бөгөөд эмгэнэлтэй хэрэг биш гэж үү.

Магадгүй Хууль зүй, дотоод хэргийн сайд Ц.Нямдорж “С.Эрдэнэ 1984 онд хүний аминд халдаад шоронд явж байхад би хэргийг нь уншиж прокурор хүн” хэмээн чуулганы хуралдааны үеэр хэлсэн нь АН-ын даргын эгдүүцлийг хүргэж намын гишүүдээ тушаалаар жагсаахад хүргэв үү. Үүнийг дан ганц Хууль зүй, дотоод хэргийн яам руу чиглэсэн агуулгаар цохсон Ц.Туваан даргын гарын үсэг бүхий албан бичиг харуулсан гэлтэй.

Үнэхээр тийм бол АН ард түмний гэхээсээ С.Эрдэнэ тэргүүтэй удирдлагуудынх нь хувийн нам болжээ. Гагцхүү энэ сарын 10-14-ний хооронд зохион байгуулж буй жагсаал цуглааны санхүүжилт хаанаас гарч байгаа бол. Намын дарга С.Эрдэнийн халааснаас уу эсвэл АН-аас уу. 21 аймаг, есөн дүүрэгт намын хороотой АН-ын гишүүдэд санаачилгаараа ирж жагсаал, цуглаанд оролцох итгэл найдвар төрөхгүй болохоор шүү дээ. Эцэст нь хэлэхэд АН-ын даргатай ам зөрсөн хүн бүрийн эсрэг жагсаад байвал энэ намд итгэл үнэмшилтэй гишүүн үлдэх үү гэдэг нь эргэлзээтэй. 

С.Сүлд