Прокурорын байгууллагаас 2019 онд Хүрээлэн байгаа орчны эсрэг гэмт хэрэг, зөрчилтэй тэмцэхэд хууль сахиулах байгууллагуудын үйл ажиллагааг уялдуулан ажиллуулах зорилт тавьсан байна.

Зорилтын хүрээнд Баянгол дүүргийн прокурорын газар тус дүүрэг дэх Мэргэжлийн хяналтын хэлтсийн газартай хамтран автомашин угаалгын үйлчилгээний ангилал, Ерөнхий шаардлага MNS 5347:2003 стандарт болон Засгийн газрын 2018 оны 73 дугаар тогтоолын 2 дахь заалтын хэрэгжилтэнд хамтарсан хяналт, шалгалт хийсэн байна.

Тус дүүргийн нутаг дэвсгэрт үйл ажиллагаа явуулж байгаа автомашин угаалгын үйлчилгээ эрхлэх 15 аж ахуйн нэгж, байгууллагуудад шалгалт хийхэд авто угаалгын газрууд үйлчилгээний явцад гарсан бохир усаа төвлөрсөн шугамд нийлүүлж байсан нь илэрчээ. Иймд саарал усаа дахин ашиглах төхөөрөмж суурилуулах тухай Улсын байцаагчийн хугацаатай албан шаардлагыг хүргүүлсэн байна.

Засгийн газрын 2018 оны 73 дугаар тогтоолын 2-т “Улаанбаатар хотын төв цэвэрлэх байгууламжид нийлүүлэх бохир усны стандартын шаардлагыг хангуулах зорилгоор шаардлагатай үйлдвэр, аж ахуйн нэгж, байгууллагуудыг урьдчилан цэвэрлэх байгууламжтай болгож, цэвэршүүлсэн усыг эргүүлэн ашиглах технологи нэвтрүүлэх” гэж заажээ.