Монголчууд хоёр Б-д “хайртай”, бас дэмждэг. Нэг нь УИХ-ын гишүүн Ж.Батзандан, нөгөөх нь жүжигчин Т.Бархүү. Улс төр, нийгмийн хүрээнд эл хоёр эрхмийг дэмждэг, алга ташилт харамгүй өгөх хэсэг нь олон. Жишээ нь, улстөрч Ж.Батзанданг АН-аас гарахад нь шүүмжлэл дайх хүн бараг гараагүй. Эсрэгээрээ гишүүн Л.Болд, С.Жавхлан нарын хамт ШИНЭ нам байгуулахад нь хүч нэмсэн байдаг юм. Харин жүжигчин Т.Бархүү “Боловсрол” суваг телевизийн “Яг түүн шиг” шоунд тасархай тэргүүлж буйг хагас финалын шатнаас нь монголчууд бид харсан, түүнийг “биширсэн” билээ.

Гишүүн Ж.Батзанданг ч мөн адил. Гэхдээ эндээс чухамдаа нэг асуулт гарч ирэв. Нийгмээс, олон нийтээс дэмжлэг хүлээдэг тэдэнд нэг талаараа баярламаар. Гэвч...

Гишүүн Ж.Батзандан Өлгий хотод уулзалт зохион байгуулах үеэрээ “Оспан баатар” гэх нэршлийг гаргаж ирсэн нь нийгмийг бухимдуулав, бүр бүгдийг нь түүний “эсрэг” болгоход хүргэв. Гэхдээ “Оспан баатар” хэмээх Ж.Батзандан гишүүний Баян-Өлгийд хэлсэн үг өнөөдөр юу тарив.

Өнөөх намыг нь төдийгүй өөрийг нь буруушаахад хүргэв. Өөрөө ч энэ тухайгаа залруулга хийсэн ч “амжилт” олсонгүй. Түүнийг эсэргүүцэгчдийн тоог улам нэмжээ.

Харин “Яг түүн шиг” шоуны финалын шатанд оролцохоор зэхэж буй жүжигчин Т.Бархүү өөрийгөө дэмжих тухай ярьсангүй. Харин ч түүнийг дэмжигчид, яагаад санал өгснөө харуулав. Т.Бархүүг ямар чадвартай жүжигчин байсныг нотлов.

Хоёр Б гэж зориуд тодотгож, тодорхойлсон нь ийм л учиртай. Өдгөө Ж.Батзандан гишүүн нам байгуулсан бол жүжигчин Т.Бархүү өөрийнхөө дэмжигчдийг бүтээж байна. Бусдыг дагуулах харизм гэж бий. Үүгээр Т.Бархүү нийт монголчуудыг дагуулж байгаа бол Ж.Батзандан гишүүн нэгээхэн хэсгийг татаж байгаа нь даанч сонирхолтой. Гишүүн Ж.Батзандангаас асууя.

Та Т.Бархүү шиг “Яг түүн шиг” байж чадах уу?!. Угтаа бол “60 тэрбум”, МАНАН мафи хэмээн ярьж байхаар Т.Бархүү шиг элэг шижлүүлэн суулгахаар ард түмнээсээ хандив гуйсан Б.Амингэрэл охины эмчилгээнд анхаарлаа хандуулсан бол гоё харагдах байжээ. Цөөхөн монголчуудад нэг ч гэсэн бяцхан зүрх, халуун амь хэрэгтэй болохоос хий хоосон хийрхэл хэрэггүй билээ. Эрхэм гишүүн Ж.Батзандан Та тэмцэж чаддаг шигээ Монгол хүн бүрийн төлөө санаа зовдог уу. 

С.Сүлд