Төрийн соёрхолт, Урлагийн гавьяат зүтгэлтэн, Чингис хаан одонт, хөгжмийн зохиолч Б.Шарав, Төрийн хошой шагналт, Ардын жүжигчин, хөгжмийн зохиолч Н.Жанцанноровт нарт төр хишгээ хүртээхээр болсон бололтой. Тодруулбал, тэдэнд Үндэсний Их баяр наадмын өмнөхөн Хөдөлмөрийн баатар цол олгохоор болсон гэнэ. Монголын сор болсон эрхэм хоёр хөгжмийн зохиолчийн Сэрсэн тал, Цагаан суварга бүтээлүүд нь алдартай билээ.

Нэгэнтээ “Биднийг гадаад дотоодод явахад танайд Б.Шарав гэдэг хөгжмийн зохиолч байдаг гэсэн яаж танилцах вэ, ямар ажил хийдэг хүн бэ, язгууртан хүн үү, олон үе дамжсан хөгжмийн боловсролтой, хөгжимчдийн удамтай хүн үү гэж асуудаг. Үгүй ээ, жирийн малчны хүү гэхээр тэд гайхдаг. Б.Шарав бол Монголын хөгжмийн зохиолч, дэлхийн хөгжмийн зохиолч гэж бид бахархах дуртай. Би хөгжим судалдаг хүн байгаа юм. Иймэрхүү хүн, иймэрхүү “юм” бүтээдэг хүн бол хамаагүй төрдөггүй юм билээ. Тийм учраас та бүхний хайр ивээл бол Б.Шаравын бүтээлийн өөрийнх нь үр шим төдийгүй энэ нутгийнхан Б.Шараваар дамжуулан дэлхийн оюуны сан хөмрөгт өөрсдийн дуу хоолойг хүргэж яваа азтай ард түмэн” хэмээн Төрийн хошой шагналт, ардын жүжигчин Н.Жанцанноров уран бүтээлийн эрхэм анд нөхрийнхөө тухай өгүүлсэн байдаг.

Харин Төрийн соёрхолт Б.Шарав “-Бид хоёр нэг үеийн хөгжмийн зохиолчид, найзууд, дарга, цэрэг хүмүүс. Манай Н.Жанцанноров том хөгжмийн зохиолч, алдартай хүн. Гэхдээ яг хөгжмийн зохиолчийн хувьд нь надтай харьцуулахад хэцүү байх. Ийм юм л даа. Миний  “Сэрсэн тал”-ыг Н.Жанцанноровын “Цагаан суварга”-тай, “Сэтгэлийн эгшиг”-ийг “Сэтгэлд шингэсэн говь”-той,  “Гэгээн алсад одох юмсан”-ыг ”Мандухай”-н аятай, бас “Аав, ээж хоёр”-ыг ”Хүний заяа”-тай харьцуулаад сайн муу, сайхан муухайн тухай их олон зүйлийг ярьж болох байх. Тэгвэл миний “Хоёрдугаар симфони”,  “Чингис хаан” дуурь, “Үлэмжийн ертөнц” симфони уран сэтгэмжийг ямар бүтээлтэй нь харьцуулах вэ. Ийм болохоор бид өөр өөр жингийн тамирчид, харин өрсөлдөгчид бол биш ээ” хэмээн ярьж байсан билээ.

С.Сүлд