Төрийн хошой шагналт, Ардын жүжигчин, хөгжмийн зохиолч Н.Жанцанноров, Төрийн шагналт, Урлагийн гавьяат зүтгэлтэн Б.Шарав нарыг Монгол Улсын Ерөнхийлөгч Х.Баттулгын зарлигаар Хөдөлмөрийн баатар цолоор шагналаа.

Хөдөлмөрийн баатар, хөгжмийн зохиолч Н.Жанцанноров нь 1949 оны гуравдугаар сарын 25-­нд одоогийн Өвөрхангай аймгийн Өлзийт сумын нутагт Цагаан хөтлийн “Хондлой” гэдэг газар төрсөн. 

Тэрбээр Өвөрхангай аймгийн Өлзийт сумын бага сургууль, Улаанбаатар хотын Багш нарыг бэлтгэх сургуульд Хөгжмийн багшийн мэргэжлээр төгсөж улмаар Украйн Улсын Киев хотын П.И.Чайковскийн нэрэмжит хөгжмийн Консерваторид суралцаж хөгжмийн зохиолч, хөгжим судлаач мэргэжил эзэмшсэн юм.

"Гарьд магнай", "Би чамд хайртай", "Мандухай сэцэн хатан", "Бүлээн нурам", "Хүн чулууны нулимс", "Тод магнай", "Цэц магнай", "Шарга даага" зэрэг дэлгэцийн уран бүтээлийн сор болсон бүтээлийг бүтээсэн. Мөн "Хийл төгөлдөр хуурын сонат", "Чавхдаст хөгжмийн дөрвөл", "Симфони", “Торой Бандийн дууль” дуулалт бүжгэн жүжиг зэрэг олон уран бүтээлээ туурвиж олон түмнээ баясгасан билээ.

Харин Хөдөлмөрийн баатар Бямбасүрэнгийн Шарав нь 1952 оны арваннэгдүгээр сарын 13-нд Хэнтий аймгийн Жаргалант суманд төрсөн.

Тэрбээр 1983 онд ОХУ-ын Свердловск (одоогийн Екатеринбург) хотын Уралын хөгжмийн их сургуулийг хөгжмийн зохиолч мэргэжлээр төгссөн. 1992 онд Төрийн шагнал, 2002 онд Урлагийн гавьяат зүтгэлтэн цол хүртсэн.

“Чингис хаан” дуурь, “Зуурдын орон” балет, “Ононд хатаагдсан илд” дуулалт жүжиг, 1, 2-р симфони, “Замбуу тивийн наран” магтуу, "Эх орон" зэрэг 30 гаруй романс, 20 гаруй цөөхүүл хөгжмийн бүтээл, "Сэрсэн тал" үндэсний найрал хөгжмийн удиртгал, “Ард Аюуш”, “Байлдааны даалгавар”, “Илүү сартай зун” зэрэг олон киноны хөгжим бичжээ. Дан хөгжмийн 70 гаруй бүтээл, 300 гаруй дуу, романс туурвисан. 20 орчим уран сайхны кинонд хөгжмийн найруулагч, зохиолчоор ажилласан байна.

Г.Нацаг