Залуучууд өөрсдийн дуу хоолой, үзэл санаагаа хувцсаараа илэрхийлэхийг зорьдог болсон. Тиймдээ ч өөрийг нь илэрхийлэх “цор ганц” хэв маягийн эрэлд гараад байгаа. Тэгвэл дэгжин, чамин харагдахад дан ганц үнэтэй брэндийн хувцас шаардлагагүй гэдгийг баталсан “гудамжны” буюу стрийт хэв маяг залуучуудын гол илэрхийлэл болоод байна.
Улаанбаатар хотын гудамжны cоёл, тэр дундаа streetwear хэв маягийн гарал үүслийг судалбал эргэлзээгүй S.M.O.K брэндтэй холбогдоно. Монгол үндэсний хэв шинжийг гудамжны загвар, хип хоп урсгалтай уусгасан загваруудыг анх санал болгож эхэлсэн S.M.O.K брэнд 2013 онд нээгдсэн даруйдаа хотын cool залуусын өмсөх дуртай брэндийн нэгээр нэрлэгдэж, олон нийтийн сүлжээнд Улаан Жамсраны зургаар чимсэн юүдэнтэй цамц, “Ulaanbaatar” гэх бичиг бүхий beanie малгайгаар гоёсон залуусын давлагаа үүсгэсэн билээ. Яг л энэ үеэс эхлэн Улаанбаатарын залуус гудамжны хувцаслалтын өөрсдийн гэсэн хэв маяг, соёлыг бүтээж эхэлсэн болов уу. Тэгвэл энэ бүх суурийг тавьж өгсөн S.M.O.K брэнд хэсэг хугацаанд завсарласны эцэст цоо шинэ цуглуулгаараа эргэн иржээ.
Энэ удаад S.M.O.K брэнд график дүрс, япон үсэг бүхий шинэ загварын Улаанбаатар болон Жамсран цамц, футболк, малгайтай цамцнаас гадна 1-8 насны хүүхдүүдэд зориулсан ULAANBAATAR цамцаа худалдаанд гаргасан байна.
Дээд зэргийн хөвөн даавуун материалаар урласан футболка нь зуны улиралд өмсөхөд биед зөөлөн, хөнгөн мэдрэмж төрүүлэхээс гадна хөдөлгөөн хорихгүй, үрчийж хуниралдах нь бага учир төрөл бүрээр загварчлан өмсөх боломжтой гэдгээрээ онцлог. Мөн дизайны хувьд хүйс үл хамааран хэн ч өмсөж болохоос гадна сонгодог эсгүүр дээр суурилсан тул биед суулт сайтай зэрэг давуу талтай.
Харин зузаан юүдэнтэй цамц, салхинаас хамгаалах цув, бомбер хүрэм зэрэг нь сэрүүн зуны орой, хүйтэн улиралд гээд цаг агаарын нөхцөл байдалд тохируулан өмсөх боломжтой, материалын хувьд хэрэглэгчид ээлтэй, илүү чанартай болсон байна. Хар, цагаан, саарал, усан ягаан, хөх цэнхэр зэрэг өнгийн сонголттой загваруудыг брэндийн үндсэн илэрхийлэл болсон "Улаан Жамсран" бурхан, Япон ханз үсгээр галигласан "Улаанбаатар" бичиг улам онцгой, үнэ цэнэтэй болгожээ.
S.M.O.K-ийн шинэ загварууд HYB TRASH SHOP дэлгүүр болон онлайн худалдааны Avlaa.mn вебсайт дээр худалдаалагдаж байгаа аж.
С.Сүлд
