ТЕГ-ын дарга асан, хошууч генерал Б.Хурц нарт холбогдох шүүх хурал өнөөдөр Төв аймгийн Эрүүгийн хэргийн анхан шатны шүүхэд болох гэж байна. Шүүх хурлаар ТЕГ-ын дарга асан, хошууч генерал Б.Хурц, Улсын Ерөнхий прокурорын орлогч прокурор асан Г.Эрдэнэбат, ТЕГ-ын нууцын зэрэглэлтэй мөрдөгч Ж.Мөнхгал, С.Баяр, О.Бархасбадь, О.Бямбажав, тухайн үед ээлжинд гарч байсан ШШГЕГ-ын хоёр ажилтан зэрэг есөн иргэнд холбогдох хэргийг хэлэлцэнэ. Тэднийг төр нийгмийн зүтгэлтэн С.Зоригийн амь насыг хөнөөсөн хэргээр ял эдэлж буй Т.Чимгээ, Б.Содномдаржаа нарыг эрүүдэн шүүсэн, гүйцэтгэх ажлын журам зөрчсөн гэх үндэслэлээр буруутгаж, хэрэг үүсгэсэн юм.

Шүүх хуралд Т.Чимгээ, Б.Содномдаржаа нар хохирогчоор оролцох юм байна.

Харин талийгаач С.Зоригийн гэргий Б.Булган хувьд Б.Хурц нарт холбогдох хэргийн шүүх хурлын урьдчилсан хэлэлцүүлэгт хохирогчоор оролцсон. Тэгвэл энэ удаагийн шүүх хуралд ч гэсэн түүнийг оролцох тухай мэдээлэл байна.