Алтан гадас одонт Говь-Алтай аймгийн Халиун сумын түүхт 60 жилийн ойн баяр наадам энэ сарын 3-5-д дэнж хотойтол дэлгэр сайхан болж өндөрлөлөө.

Баяр наадмын хүчит бөхийн барилдаанд улсын гарьд Ж.Бат-Эрдэнэ, улсын заан Б.Соронзонболд, улсын харцага О.Хангай, улсын начин Ч.Батчулуун, Л.Гантулга, С.Багахүү, Б.Амарзаяа, Б.Хишигбаатар тэргүүтэй 128 бөх барилдлаа. Энэ барилдаанд Говь-Алтай аймгийн Халиун сумын харъяат, Хантайшир дэвжээний бөх аймгийн арслан Баарангийн Отгонбаатар түрүүлж, Ховд аймгийн Буянт сумын харъяат, Их Монгол сан, Од групп, Ховд дэвжээний бөх улсын харцага О.Хангай үзүүрлэлээ. Их шөвөгт Улсын гарьд Ж.Бат-Эрдэнэ, улсын начин Б.Амарзаяа нар тус тус шалгарлаа.

Тус барилдаан болон соёолон насны худан морины уралдааны бай шагналыг "Бурхан буудай" групп ивээн тэтгэсэн бөгөөд түрүү бөх таван сая, үзүүр бөхийг 2.5 сая төгрөг, соёолонгийн түрүүг таван сая төгрөгөөр байлжээ.

Б.Жаргал