Монгол Улсад авто замын салбар үүсч хөгжсөний түүхт 90 жилийн ойн баяр наадам Хүй долоо худагт болж байна. Баяр наадмын хүчит бөхийн барилдаанд Архангай аймгийн Чулуут сумын харьяат, "Бурхан буудай" группийн бөх, улсын начин Б.Амарзаяа түрүүлж, Л.Лха-Очир үзүүрлэв. Их шөвөгт улсын заан М.Өсөхбаяр, М.Бямбадорж нар шалгарлаа.
Энэ барилдаанд улсын аварга Ч.Санжаадамба, Э.Оюунболд, арслан П.Бүрэнтөгс тэргүүтэй 128 бөх зодоглосон юм.

Ч.Санжаадамба аварга хоёрын даваанд сумын заанд унасан бол Э.Оюунболд гурвын даваанд "ажил гарлаа" хэмээн зарлуулаад барилдсангүй. Улмаар зүүний магнайг тэргүүлэх эрхийг эдэлсэн арслан П.Бүрэнтөгс энэ наадмын үзүүр бөхөд тахим буулгажээ. Тус барилдааны түрүү бөхийг 10, үзүүр бөхийг зургаан сая төгрөгөөр шагнаж урамшууллаа.