Үндэсний Их баяр наадмын хүчит бөхийн барилдааны шөвгийн 16 бөхийн хоёроос нь сэргээш илэрсэн тухай мэдээлэл өнгөрсөн өдрүүдийн гол сэдэв байв. Угаас бөхөд хайртай монголчууд чухам хэн гэдэг хоёр бөхөөс сэргээш илэрсэн тухай таамаг дэвшүүлж, тэдгээрийн эрэлд гарлаа. Допингийн эсрэг төв болон Үндэсний их баяр наадмыг зохион байгуулах хорооноос энэ тухай албан ёсны тайлбар, мэдээллийг хийгээгүй болохоор нийгэм тэр дундаа цахим сүлжээнд сэргээш илэрсэн гэх хоёр бөхийг өөр өөрсдийн хэмжээнд “нэрлэж” эхлэв.

Үүнтэй холбоотойгоор бөхийн барилдааны шөвгийн 16-д үлдсэн бөхчүүд өөрсдийн цахим хуудсаар дамжуулан БНСУ руу явуулсан сэргээшийн шинжилгээнээс ямар нэгэн “НО” илрээгүй гэдгийг өчигдрөөс мэдэгдэж эхэлсэн юм. Өөрөөр хэлбэл, Улсын аварга Н.Батсуурь, арслан П.Бүрэнтөгс, Ц.Содномдорж тэргүүтэй 14 нь лайв хийж, сэргээш илрээгүй болохыг онцолсон.

Бөхчүүд сэргээш хэрэглэсэн эсэх эцсийн албан ёсны тайлбарыг Допингийн эсрэг төвөөс хүргүүлсэн бичигт үндэслэж Үндэсний их баяр наадмыг зохион байгуулах хорооноос хийх мэдээлэл мухарлах болохоор одоохондоо хэн гэдэг бөхөөс илэрснийг таамаглаж хэлэхэд эрт.

Харин нийгэм, бөх сонирхогчдын маргааны сэдэв болсон энэ асуудлаар Ерөнхий сайд У.Хүрэлсүх Үндэсний их баяр наадмыг зохион байгуулах хороонынхонд байр сууриа илэрхийсэн бололтой. Тэрбээр “Шударга үнэний төлөө явж байгаа хүний хувьд шударга бус зүйлтэй эвлэрэхгүй. Спорт шударга байх ёстой. Бөхчүүдээс допинг илэрсэн бол зохих журмын дагуу хариуцлага тооцоод яв” гэжээ. Ерөнхий сайд У.Хүрэлсүхийн байр сууриас харахад хоёр бөхөөс сэргээш илэрсэн нь үнэн л юм бол энэ удаад толгойг нь илээд хав дараад өнгөрөх бус хариуцлага тооцох үүрэг нь Үндэсний их баяр наадмыг зохион байгуулах хороо, түүний дарга Ө.Энхтүвшинд ногдож байгаа бололтой.

Г.Эрхэс