Олон улсын хөгжмийн наадмын стандартыг нэвтрүүлэх зорилготой “Хуур” хөгжмийн наадам \XMF\ гурав дахь жилдээ зохион байгуулагдах гэж байна.

"XMF" фестиваль энэ сарын 23, 24-ний өдрүүдэд болох бөгөөд бэлтгэл ажил 90 орчим хувьтай байгаа юм байна. Эхний өдөр 13 орчим уран бүтээлч буюу тухайлбал, Rocket Bay, Г.Энэрэл, Vandebo, Mr.M, Big GEE нар уран бүтээлээ толилуулах бол мөн өдөр Канад улсын DJ үдшийг доргиох аж. Харин наадмын сүүлийн өдөр электроник хөгжмийг чиглэлээр явагдана. Энэ хүрээнд гаднын томоохон фестивальд тоглодог Япон, Тайланд, Хятад, Герман, Голланд, Солонгос зэрэг долоон орны DJ нарыг урьжээ.

Энэ жилийн хувьд наадмын тоног төхөөрөмж, гэрэлтүүлэг, дэлгэц, тайз, талбайн тохижилт, үзэгчдийн аюулгүй байдал, түргэн тусламж, хамгаалалт зэргийг сайтар хангаж, бэлтгэжээ. Мөн 20 гаруй мянган үзэгч тус наадмыг зорино гэсэн хүлээлттэй байгаа талаар зохион байгуулагчид хэлсэн юм.

Наадмын ерөнхий продюсер Ж.Энхжаргалан “Дээрх тоог өнгөрсөн жилүүдийн дунджийг тооцож гаргасан. Бид үзэгчдийнхээ ая тухтай байдлыг дээд зэргээр хангахыг зорьж байна. Ариун цэврийн өрөө маш их ачаалалтай байдаг тул 20 орчим хуурай ариун цэврийн өрөөг нэмж байршуулсан. Хуур хөгжмийн наадам нь дотоодын шинэ авьяаслаг залуучуудыг нээх, урлаг соёлоор дамжуулан нийгэмд эерэг хандлага түгээх, уриалах, сонсогчдод дэлхийн жишиг бүхий хөгжмийн соёлыг түгээх зорилготой” гэв.

Түүнчлэн XMF наадмын зүгээс үзэгчдэдээ бэлэг задлах гэж байна. Тухайлбал, энэ сарын 13, 14-ний өдрүүдэд наадмын тасалбарыг 50 хувь хямдруулж борлуулах бөгөөд гурван найзын  "тасалбарыг" 30 мянган төгрөгөөр борлуулах юм. Тасалбарыг shoppy.mn, Голомт банкны аппликейшнээр худалдаална. Одоогийн байдлаар 8500 орчим тасалбар худалдаанд гарсан гэдгийг зохион байгуулагчид хэлж байлаа.

Уг наадмыг 16 буюу түүнээс дээш насны хүмүүс үзэх боломжтой. Мөн наадмынм өдрүүдэд аюулгүй ажиллагааг хангах зорилгоор 500 орчим арын албаны хүн ажиллах юм байна.

Б.Лхам