Үндэсний баяр наадмыг зохион байгуулах хорооны дарга, Шадар сайд Ө.Энхтүвшин бөхчүүдээс допинг илэрсэн асуудлаар мэдээлэл өглөө. Тэрбээр “Баяр наадмын бөхийн салбар комисс өнөөдөр мэдээлэл хийсэн. Хуулиараа баяр наадамд шөвгөрсөн 16 бөхөөс сэргээшийн шинжилгээ авах хуультай. Шинжилгээгээ аваад Солонгос руу явуулсан. Бараг сарын дараа хариу ирсэн байна. 14 хүнд эсрэг буюу хориотой бодис илрээгүй. Хоёр бөхөд асуудал байгаа. Холбогдох журмаараа тухайн хоёр бөх В сорьцын дүнг харна гэж санал гаргах юм бол зардлаа өөрөө хариуцаад шинжилгээ хийлгэнэ. Тэр дүн гарах хүртэл бөхчүүдийн асуудлыг нийтэд хэлэхгүй гэсэн журамтай. В сорьцын шинжилгээний дараа нэрийг нь шууд зарлана. Хэдийд ямар нотолгоо, үндэслэл байгаа вэ гэдгийг харах ёстой“ гэсэн юм.

Түүнийг мэдээлэл хийхээс өмнө Бөхийн салбар хорооноос мэдээлэл хийж, сэргээш илэрсэн хоёр бөх ямар нэгэн хариу ирүүлээгүй тохиолдолд нэрийг нь зарлана хэмээн мэдэгдсэн билээ.

С.Сүлд