ТЕГ-ын дарга асан Б.Хурц болон УЕП-ын орлогч прокурор асан Г.Эрдэнэбат нарын есөн иргэнд холбогдох шүүх хурал болж байна. Шүүх хурал 30 минут завсарлаад эргээд хуралдсан. Завсарлагаанаар нэр бүхий есөн иргэний өмгөөлөгч болох Г.Батбаяр зарим нэг тайлбарыг сэтгүүлчдэд өгсөн юм. Ингээд түүний тайлбарыг хүргэе.

-Таны үйлчлүүлэгчид холбогдох хэргийг буруу зүйлчилсэн гэдэг зүйл яригдаж байна. Та үүнд ямар байр суурьтай байна вэ?

-Миний үйлчлүүлэгчийг яллаж байгаа зүйл анги нь эрүүгийн байцаан шийтгэх ажиллагааны эсрэг гэмт хэрэгт хэрэглэдэг мөрдөн шалгах ажиллагааны үед хэрэг бүртгэгч хэрэг хүлээхийг албадан тухайн иргэнийг зодсон, хүч хэрэглэсэн байвал яллавал зүйл анги. Гэтэл бодит байдал дээр хоригдож байсан этгээд зодсон шүү дээ.

Өөрөөр хэлбэл, ялтан Ц.Амгаланбаатар, ялтан Итгэлтөгс нар бусдыг зодсон. Тэдний хийсэн хэрэг нь эрүүл мэндийн эсрэг гэмт хэрэг. Хэрвээ бусдын биед гэмтэл учруулсан бол сахилгын арга хэмжээ авах ёстой.

2“Хэргээ хүлээж” гэж хэлж байгаа нь бичлэгт бичигдсэн байсан шүү дээ?

-Энэний хувьд тагнуулын тагнан турших үйл ажиллагаа буюу гүйцэтгэх ажиллагааны ажил явагдсан. Нууц камер байршуулсан. Итгэлтөгсийг оруулж, аюулгүй байдлыг хангуулсан. Түүнэс биш тагнан турших ажиллагаа явагдаж байх үед нэгнийгээ алгадлаа гэхэд тагнуулын ажилтан гүйж ороод “Одоо боль” гэж салгах ямар ч боломжгүй.

-Та ямар үндэслэлээр цагаатгах ёстой гэж үзэж байгаа юм бэ?

-“Эрүүдэн шүү” гэсэн үүрэг даалгаврыг миний үйлчлүүлэгч өгөөгүй. Ямар нэгэн байдлаар нотлогдохгүй. Манай үйлчлүүлэгчдийг “Зод, нүд” гэсэн даалгавар өгсөн гэж буруутгаж байна.

-Ийм боломжоор нь хангасан юм биш үү?

-Ялтан Ц.Амгаланбаатар “Би хүн алсан” гэж яриаг үнэн, худлыг тогтоох зорилгоор ялтан Б.Содномдаржаатай нүүрэлдүүлсэн. Энэ үеэр Ц.Амгаланбаатар “Чи яаж алсан билээ” гэж хэлээд Б.Содномдаржааг нэг алгаддаг. Энэ бол эрүүдэн шүүлт биш.

-Ялтан Т.Чимгээ, Б.Содномдаржаа нарын гэр бүлийг яагаад шүүх хуралд оролцуулаагүй юм бэ?

-Эдгээр хүмүүс шүүх хуралд хохирогчоор оролцож байна. Ар гэрийнхний хувьд шүүх хуралд оролцуулах боломжгүй. Учир нь Эрүүгийн хэрэг хянан шийдвэрлэх тухай хуулийн 1.4-т шүүх хуралд ямар этгээд оролцох ёстойг тусгайлан зааж өгсөн байдаг. Тиймдээ ч Түр хорооны гишүүдийг оролцуулахгүй гэсэн шийдвэр гаргасан. Эрүүгийн хэрэг хянан шийдвэрлэх хуульд “Ажиглагч” гэсэн статус байхгүй.

-Шүүгдэгч нарын ар гэрийнхэн оролцож байгаа юу?

-Хаалттай шүүх хурал учир оролцох боломжгүй.

-Таны үйлчлүүлэгч эрүүдэн шүүлтийг мэдсэн юм болов уу?

-Огт мэдээгүй. Хэзээ сүүлд нь мэдсэн. УИХ-ын гишүүн Ж.Батзандангийн ярьсан зүйл бүхэн худал. МҮОНРТ-ээр гаргасан бичлэг нь байгаа бүх бичлэг нь. Өөр бичлэг байхгүй.

-Бичлэгт бичигдсэн зүйл эрүүдэн шүүлт мөн үү?

-Тухайн алба хаагчдын хувиас харвал энэ бол эрүүдэн шүүлт биш. Учир нь эрүүдэн шүүлт гэдэг нь хэрэг бүртгэгч, мөрдөгч цохиж, зодвол энэ бол эрүүдэн шүүлт. Хоригдлууд хоорондоо зодолдож, маргалдсан асуудлыг танхайрах, эрүүл мэндэд хохирол учруулах гэсэн зүйл ангиар авч үзэх ёстой.

Г.Алимаа