Нийтийн тээврийн хэрэгслээс ялгарах утааны тортогжилтын хэмжээг явуулын оношилгооны багажаар хэмжих шалгалтын ажлыг Нийтийн тээврийн үйлчилгээний газраас эхлүүлжээ.
Шалгалтын ажил эхэлсэн эхний хоёр өдрийн байдлаар нийтийн тээврийн 13 компанийн их багтаамжийн 69 автобус шалгалтад хамрагдсан бөгөөд утааны тортогжилтын хэмжээ стандартын үзүүлэлтээс их байжээ.
Иймд автотээврийн хяналтын улсын байцаагч холбогдох хууль, тогтоомжийн дагуу хариуцлага тооцон, тухайн аж ахуйн нэгжүүдэд улсын байцаагчийн хугацаатай албан шаардлага хүргүүлсэн байна.
Монгол Улсын Засгийн газрын 2016 оны 213 дугаар тогтоолын дагуу нийтийн тээврийн хэрэгсэл жилд хоёр удаа техникийн үзлэг, оношилгоонд хамрагддаг. Тэгвэл энэ оны намрын нэгдсэн үзлэг оношилгоо ирэх сард эхэлнэ гэж Нийтийн тээврийн үйлчилгээний газраас мэдээллээ.
