Б.Хурц нарын есөн хүнд холбогдох шүүх хурал дөрөв дэх өдрөө үргэлжилж байна. Уг шүүх хурлын явцын талаар Төв аймаг дахь шүүхийн Тамгын газрын зохион байгуулалт хариуцсан мэргэжилтэн Б.Жавхланбаяр мэдээлэл өглөө.
Тэрбээр “Шүүх хуралдаан хуульд заасан дарааллын дагуу явагдаж байна. Одоогийн байдлаар эд мөрийн баримтыг шинэчлэн судалж байна. Эд мөрийн баримтаар хураагдсан бичлэгүүдийг үзэх, дараа нь бичгийн нотлох баримтыг үзэж судлах дараалалтай. Шүүх хурлын явцыг харахад маргааш үргэлжлэх хандлагатай байна. Учир нь энэ хэрэг олон оролцогчтой учраас ээдрээ, төвөгтэй. Мөн олон хавтаст хэрэг байгаа учраас ганц, хоёр хоног хуралдаад дуусахгүй. Өнгөрсөн өдрүүдэд танхимд байгаа хүмүүсийн биеийн байдал муудах, даралт нь ихсэх асуудал гарч байсан. Өнөөдрийн байдлаар тийм асуудал гараагүй” гэсэн тайлбарыг өглөө.
Мөн нэр бүхий дөрвөн гэрч мэдүүлэг өгчээ. Гэрчээс авах мэдүүлэг дууссан гэлээ.
Б.Цэцэг