Таван давхар сараалжин торонд бог мал хашиж, автомашинаар тээвэрлэж буй мэдээлэл олон нийтийн сүлжээгээр цацагдсан. Тэгвэл уг мэдээллийн дагуу НМХГ-аас энэ сарын 17-нд шалгахад Баянхонгор аймгийн Бууцагаан сумаас иргэн А худалдан авсан гэх 470 толгой ямааг хүнд даацын ачааны автомашин тэвшин дээр таван давхар сараалжиндхийж, тээвэрлэсэн байжээ. Тээвэрлэсэн ямааг Эмээлтэд байрлах "Дун Фан интернэйшнл трэйд" компанийн хашаанд буулган, Дүүргийн мал эмнэлгийн тасгийн эрхлэгч байлцан хүлээж авсан байв.

Шалгалтаар тээвэрлэлтийн явцад 3 ямаа үхэж хорогдсон, мөн 3 ямаа муужралтын байдалтай, 45 ямаа дарагдаж тамиргүй болсон, босч чадахгүй байв. Иймд тус үйлдвэрийн дарга, малын эмч нарыг байлцуулан ерөнхий үзлэг хийж, бэлчээрт гарган, малын эмчийн хяналтад байх үүрэг өгсөн байна. Эдгээр 470 ямаанд Баянхонгор аймгийн Бууцагаан сумаас мал амьтны гарал үүслийн гэрчилгээ олгосон байна.

Түүнчлэн энэ сарын 19-нд дахин үзлэг хийхэд муужралтын байдалтай байсан ямаанаас гурав нь нэмж хорогдсон байсан бөгөөд үхэж хорогдсон 6 ямааг дүүргийн Мал эмнэлгийн тасгийн хяналтад шатааж, булж устгуулан, иргэн А-д зөрчлийн хэрэг үүсгэн шалгаж байна.