"Нарны хүү Сарны охин" ХХК-иас "Нүүдэлчин" ХХК иргэдийн орон сууцанд орох боломжийг нь хааж байгаа талаар мэдээлэл хийлээ. 

Тус компани 2015 оноос эхлэн иргэдийг жилийн таван хувийн хүүтэйгээр хямд үнэтэй орон сууцаар хангаж иржээ. Тэд энэ хугацаанд 16 орчим тэрбум төгрөгийн эх үүсвэрээр 200 орчим айлыг орон сууцанд оруулжээ. Энэ нь дэлхийн жишигт нийцсэн хүү гэдгийг онцолсон юм. Дэлхийн бусад улсад тухайлбал, АНУ-д жилийн 2.2 хувь, БНСУ-д 3.5 хувьтай байдаг учраас манай улс ипотекийн зээлийн хүүг цаашид ч бууруулах боломжтой гэж тус компани үзжээ. Мөн “Ипотекийн зээлийг өөрийн эх үүсвэрээр санхүүжүүлэх боломжийн судалгаа” төслийн хүрээнд цаашид хэдэн хувьд бууруулж болох боломжийг судалж, зээлийн хүүг бууруулна гэв.

Энэ талаар "Нарны хүү Сарны охин" ХХК-ийн захирал н.Гүрсоронзон “Бид төслүүдээ “амар амгалан” гэж нэрлэдэг. Учир нь сард төлөх хувь бага. Мөн зээлийн хүүг урьдчилж авахгүйгээр үндсэн төлөлтөөс нь хасч явдагаараа давуу талтай. Зарагдахгүй байгаа олон барилгуудыг эдийн засгийн эргэлтэд оруулах боломжтой байсан юм. Гэвч манай харилцагч компанийн ёс зүйгүй, бусармаг үйлдлээс болж сүүлийн нэг жилд “амар амгалан” зогсонги ороод байна. Бидний хувьд “Амар амгалан-3” төслийг хэрэгжүүлж эхлээд байсан юм. Гэвч уг газрыг худалдах, худалдан авах гэрээгээр уг газрыг “Нүүдэлчин” ХХК-иас нэг тэрбум 300 сая төгрөгөөр худалдан авсан.

Гэтэл тус компани 116 сая төгрөгөөр худалдаж авсан буюу давхар гэрээ хийж нэг тэрбум 300 сая төгрөгийнхөө татварын төлөхгүй явсаар өдийг хүрсэн. Бид хэрэглэгчдийнхээ эрх ашгийг хамгаалж төслөө эхлүүлэх шаардлагатай байна хэмээн удаа дараа албан шаардлага хүргүүлж байсан.

“Нүүдэлчин” ХХК-иас өнгөрсөн долдугаар сарын 5-ны өдөр хариу бичиг ирүүлсэн. Тухайн бичигт “Гэрээг цуцлахаар тохиров. Гэрээгээр хүлээсэн үүрэг, төлбөр тооцоо болон барилгын суурь ажилд зарцуулсан нийт зардлын тооцоо зэргийг харьцуулж шийдвэрлэнэ” гэсэн. Ийнхүү “Амар амгалан-3” төсөл хэрэгжиж чадахгүй болсон тул захиалагчдынхаа гэрээг мөн цуцалсан. Одоогийн байдлаар “Нүүдэлчин” ХХК-иас үүдэн тав орчим тэрбум төгрөгийн алдагдал хүлээгээд байна.

Бид ихэвчлэн ипотекийн найман хувийн зээлд хамрагдаж чадахгүй, банкны шаардлага хангахгүй байгаа иргэдийг орон сууцжуулдаг” гэсэн юм.

Хэрэв “Амар амгалан-3” төсөл хэрэгжсэн бол 400 гаруй айл өрх орон сууцанд хамрагдах байжээ. Цаашид хямд хүүтэй уг төслийг хэрэгжүүлнэ. Мөн н.Гүрсоронзонгийн гэр бүлийг заналхийлсэн асуудал их ирсэн тул холбогдох хуулийн байгууллагад хандана гэлээ.

Б.Лхам