Баянхонгор аймгийн Мэргэжлийн хяналтын газраас тус аймгийн Бөмбөгөр сумын нутаг дэвсгэрт бичил уурхайгаар ашигт малтмал олборлогч нөхөрлөлүүдийн үйл ажиллагаанд урьдчилан сэргийлэх хяналт шалгалтыг хийжээ.

Хяналт шалгалтад 17 нөхөрлөл нэг иргэн хамрагдсан байна. Шалгалтаар есөн нөхөрлөл Засгийн газрын 2017 оны 151 дүгээр тогтоолоор батлагдсан “Бичил уурхайгаар ашигт малтмал олборлох журам”-д заасан механизмаас илүү хүчин чадал бүхий механизм ашиглан үйл ажиллагаа явуулж байгаа зөрчил илэрсэн байна. Тиймээс илэрсэн зөрчлийг таслан зогсоож бичил уурхайгаар ашиглалт явуулсан талбайг нөхөн сэргээх, дотоод шаталтат хөдөлгүүр 3500 см3-ээс илүү хүчин чадал бүхий механизмийн ашиглалтыг зогсоож, талбай чөлөөлөх тухай акт өгч, Зөрчлийн тухай хуулийн дагуу шийтгэлийн арга хэмжээг ногдуулсан байна.

Түүнчлэн сумын Засаг дарга, Байгаль орчны хяналтын улсын байцаагч нарт бичил уурхайгаар ашигт малтмал олборлох журам зөрчсөн нөхөрлөлүүдийн үйл ажиллагаанд хяналт тавьж нөхөн сэргээлтийг стандартын дагуу гүйцэтгүүлэн хүлээн авч ажиллах талаар албан бичиг хүргүүлжээ.