УИХ-ын гишүүн Д.Хаянхярваа цаг үеийн асуудлаар байр сууриа илэрхийллээ. Тэрбээр "Өчигдөр орой над руу туслахууд нь маань холбогдож ийм мэдээ явж байна гэдгийн дуулгасан. Тэр дагуу нь гэрээсээ лайв хийсэн. Миний хувьд хоёр хоногийн өмнө Ийгл телевизэд ярилцлагад орох үеэрээ хувийн хэвшлийнхнийг хамгаалж ярьсан. Хариуцлагатай уул уурхай, шударга ёсыг тогтоох гэж байгаа Ерөнхий сайдыг ажлыг эсэргүүцээд байх шаардлагагүй. Хуульдаа асуудал байгаа бол тэрийг нь засах эрх Ерөнхийлөгч, Засгийн газар, УИХ-д байгаа. Уул уурхайн салбарыг хамгаалаад байх асуудал надад байхгүй. Гэхдээ аж ахуйн нэгжүүдтэй биш зөвшөөрөл өгсөн албан тушаалтнуудтай нь ярих хэрэгтэй. Зөвшөөрлөө аваад явж байгааг нь хааж боогоод байвал хөрөнгө оруулагчид орж ирэхгүй. Сүүлд Ерөнхий сайдыг огцруулах асуудлыг надтай холбож эхэллээ. Сонгууль болох гэж байхад засаг төрөө унагаадаг нам, улс төрийн хүчин гэж байхгүй. Хэрвээ тийм асуудал гарч ирвэл би оролцохгүй. Яагаад гэвэл цаг хугацаа нь биш ээ. Үндсэн хуулийн нэмэлт, өөрчлөлтийг хийж чадлаа гэхэд төсвөө батална. Сонгуулийн хуулиа гаргана. Он гараад л сонгууль эхэлнэ. Засгийн газрыг огцруулах гэж байна гээд нэр хоч зүүж эхэллээ. Ингэж болохгүй. Хэлэх ярих зүйлээ хоёр нүд рүү харж байгаад хэлчихэж чадна. Ар хударгаар нь юм хийхгүй. Аливаа ажлыг хийхэд гашуун ч гэсэн үнэн үг хэрэг болдог.

Ийм мэдээлэл гарч байгаа асуудал нь манай нам дотроос залуучууд гаргаж байгааг мэдэж байна. Тэр бүгдийг шалгуулна. Нэг юм гарахаар нь хаяж болно. Гэтэл ийм увайгүй улс төрийн хүрээнд 2020 онд сэтгэцийн өвчтэй болох нь байна. Нийгмийг турхирч болохгүй. Нэг эргүүлэгт нь орчихвол хэцүү. Арга нь улам нарийсна. Тиймээс ёс суртахуунтай байцгаая. Нэгнийгээ шүүмжилж, шүүмжлүүлж болно" гэлээ.

С.Сүлд