Баянзүрх дүүрэгт баригдаж байсан "Амар амгалан" хотхоны барилгууд хугацаандаа ашиглалтад ордоггүй байдлаас болж урьдчилгаа төлбөрөө хийсэн иргэд амиа хорлохыг завдсан хэрэг дөнгөж сая гарлаа. Тодруулбал, Баянзүрх дүүрэг дэх Холбоо мэдээлэл, технологийн сургуулийн хажууд байрлах “Амар амгалан-1” байрны дээвэр дээр нэр бүхий иргэд үсрэхийг завдсан байна. Яг одоогийн байдлаар цагдаагийн байгууллагаас иргэдийг ятгаж, үсрэхээс хамгаалж байгаа бөгөөд байр руу орох, гарах гарцыг хаасан байдалтай байна.

Хэргийн нөхцөл байдлыг тодруулбал, тус хотхоныг “Нарны хүү Сарны охин” компани барьж буй бөгөөд тус компанийн удирдлагууд "2015 оноос эхлэн иргэдэд өөрийн санхүүжилтээр жилийн 5 хувийн хүүтэй ипотекийн зээл олгож, орон сууцжуулах төслийг амжилттай хэрэгжүүлсэн. Энэ хугацаанд 16 орчим тэрбум төгрөгийн санхүүжилтыг гарган, нийт 200 орчим өрхөд 5-20 жилийн хугацаатайгаар жилийн 5 хувийн хүүтэйгээр орон сууцны зээлд хамруулан, орон сууцжуулсан. Гэвч өнөөдөр өөрийн санхүүжилтгүй болсон" талаар мэдээлж байсан юм.

Тэгвэл одоогоор дээрх төсөл зогсонги байдалд орсон бөгөөд урьдчилгаа төлбөр өгсөн ч байрандаа орж чаддаггүй, эргүүлээд авъя гэхээр буцаах хөрөнгө байхгүй. Нөгөөтэйгүүр, орон сууцныхаа түлхүүрийг авсан ч байрны ордероо гаргуулж авч чадахгүй нөхцөл үүсээд байгаа аж. Тиймээс тус төслөөс болж хохирсон иргэд амиа егүүтгэхээр ийн оролдсон байна.

Бид энэ талаар нэхэн сурвалжлах болно.

Г.Алимаа