Энэ сарын 21-нд Новотел зочид буудалд нэр бүхий улстөрчид болон бизнесмэнүүд уулзалт хийх үеэр Монгол газар компанийн захирал Ц.Мянганбаярын бие муудаж, эмнэлэгт хүргэгдсэн тухай мэдээлэл цацагдсан. Уг мэдээлэл үнэн эсэхийг тус зочид буудлын ерөнхий менежер Майкл Шумахераас тодрууллаа.

-Энэ сарын 21-нд танай зочид буудалд нэр бүхий улстөрчид болон бизнесмэнүүд уулзалт хийсэн нь үнэн юм уу?

-Олон улсын зочид буудлын менежментийн дүрмээрээ бид бүх зочдынхоо хувийн мэдээллийг хадгалах ёстой. Тиймээс энэ талаар мэдээлэл өгөх боломжгүй гэдгийг та бүгдийг ойлгоно гэж найдаж байна.

-“Монгол газар” компанийн захирал Ц.Мянганбаярын бие муудсан гэсэн яриа бий?

-Новотел Улаанбаатар зочид буудлын Ерөнхий менежерийн зүгээс ямарч зочны болоод манай ажилтны  эрүүл мэндтэй холбоотой  асуудлыг тэдний зөвшөөрөлгүйгээр хөндөн тавих боломжгүй юм. Гэхдээ тийм зүйл болоогүй гэдгийг хариуцлагатай мэдэгдэе.

-Ер нь ямар нэгэн байдлаар уулзалт болсон уу. Бизнесийн хүрээллийн төлөөллийнхөн ч юм уу?

-Ерөнхий дүрмээрээ манай байгууллагад болж байгаа аливаа үйл ажиллагаатай холбоотой мэдээллийг гадагш гаргах боломжгүй байдаг юм. Тухайн өдөр манай зочид буудлын уулзалтын өрөөнүүд өөр захиалгатай байсан. Гэхдээ олон хүн энэ тухай байн байн асуугаад байгаа болохоор нэг мөр болгож манайд тийм зохион байгуулалтай, ямар нэгэн улс төрч, бизнесийн уулзалт, цуглаан болоогүй  гэдгийг хариуцлагатай хэлье

-Ийм мэдээлэл хаанаас гарсан юм бол. Зарим хүний яриагаар танай байгууллага дотроос энэ мэдээллийг өгсөн гээд байгаа?

-Бид нар энэ мэдээллийн эх сурвалжийг мэдэхгүй, иймэрхүү тодорхойгүй мэдээллийн үйл явцад оролцохыг хүсэхгүй байна.

Г.Эрдэнэ