П.Н.Шастины нэрэмжит улсын Гуравдугаар төв эмнэлэгт тархины судасны цүлхэнг судсан дотуур эмчлэх технологи нэвтрүүлсэн байна. Энэ хүрээнд ХБНГУ-ын "Katharinenhospital Stuttgart" эмнэлгийн Мэдрэлийн мэс заслын тасгийн эрхлэгч профессор Ханс Хэнкэс болон ОХУ-ын В.А.Алмазовын нэрэмжит "Анагаах ухааны үндэсний судалгааны төв"ийн зөвлөх, профессор Андрей Евгеньевич Петров нар тус эмнэлэгт хүрэлцэн ирж, хамтран ажиллаж байгаа аж.
Мэргэжлийн багийнхан хамтарч 3 дахь удаагаа хамтарсан мэс засал хийгээд байна. Энэ хугацаанд тархины артерийн судасны хүнд хэлбэрийн том болон олон цүлхэнтэй эмгэгийг судсан дотроос нь цусны урсгал өөрчлөгч стент (имплант) тавьж эмчлэх судсан дотуурх мэс засал эмчилгээг нийт 12 хүнд амжилттай хийж гүйцэтгэжээ.