Ажил үүргээ гүйцэтгэж явсан цагдаагийн гурван алба хаагч Туул голд живж байсан иргэний амь насыг өчигдөр аварсан юм. Тухайн иргэнийг аврахаар  ахлах дэслэгч Ц.Энхжин яаран ус руу орж, живж буй иргэнийг аврах гэхэд өөрийг нь хүзүүдэн ус руу дарснаас болж хамт живэх шахсан байна. Энэ үед эрүүгийн төлөөлөлөгч, цагдаагийн ахмад Б.Соронзонбаатар, С.Оргил нар амжиж ирснээр бүгдээрээ уснаас эсэн мэнд гарцгаажээ. Энэ талаар нийслэлийн Цагдаагийн газрын Мөрдөн шалгах газрын Хүнд гэмт хэрэгтэй тэмцэх хэлтсийн эрүүгийн мөрдөгч, цагдаагийн ахлах дэслэгч Ц.Энхжинээс тодрууллаа.

-Усанд живэх гэж байсан иргэний амийг аварсанд талархал илэрхийлье.

-Баярлалаа.

-Өнөөдөр төрсөн өдөр чинь тохиож байна. Хорвоод мэндэлсэн өдрөөрөө бусдын амийг аврах нь билэгшээлтэй сайхан ерөөл байхаас өөр яалтай. Өөрөө усанд сэлж чаддаг байсан юм уу?

-Цагдаагийн академид бүх зүйлийг зааж сургадаг. Хувийн сонирхолоороо ч усан спортоор хичээллэдэг байсан. Хамт явсан хоёр цагдаа маань ч гэсэн усанд сэлж чаддаг байсан. Энэ нь их тус боллоо. 

-Тухайн үед яг юу болсон юм бэ?

-Дээрэмдэх гэмт хэрэг үйлдсэн этгээдийг Туул голын эргээр баригдаж байгаа барилгуудаар хайж явсан юм. “Зайсан Хилл”-ээс Туул гол их ойрхон шүү дээ. Гэтэл нэг хүн “Авраарай” гэж орилсон. Гол руу харахад нэг хүний гар уснаас цухалзаж байсан. Маш хурдан болсон болохоор аврах ёстой л гэж бодсон. Гүйх замдаа хүрэм, цамцаа тайлж шидээд ус руу үсэрсэн.

-Тухайн иргэнийг аврах үед өөрийг тань живүүлэх дөхсөн гэсэн. Хэдхэн хоногийн өмнө усанд живж байсан иргэнийг аврах гэж байгаад цагдаагийн алба хаагч өөрөө амиа алдсан харамсалтай хэрэг гарсан шүү дээ. Ийм зүйл болох вий гэж айгаагүй гэж үү?

-Тэгж бодож амждаггүй юм билээ. Хэдхэн хоромын дотор л болсон. Сэлээд очих үед тэр хүн шоконд орчихсон байсан. Намайг шууд хүзүүдэж аваад ус руу дарсан. Амьхандаа уснаас гарч, амьсгал авах гэсэн байх л даа. Яг энэ үед манай хоёр цагдаа ирж, бүснээс нь татаж уснаас гаргасан.

-Яг ийм тохиолдлоор хоёулаа живсэн тохиолдол их байдаг гэсэн.

-Тийм юм байна лээ. Гэхдээ тэгж бодох сөхөө огт гараагүй.

-Тухайн иргэн амиа хорлохоор ус руу орсон гэсэн. Үнэн юм болов уу?

-Тэрийг сайн мэдэхгүй байна. Уснаас гаргаад хиймэл амьсгаа хийсэн. Уг нь онцгой байдал дуудсан л даа. Гэтэл “Нэгэнт аварчихсан бол бид очихгүй” гэсэн. Уснаас гарахад их хэцүү байсан. Бороо их орсны улмаас Туул гол их үертэй байсан. Арай хийж л гарсан. Тэгээд л түргэн дуудаад өгч явуулсан. Түргэний эмч нар ГССҮТ-д хүргэж өгсөн гэсэн.

-Туул голын дагуу хүн хайж явсан гэсэн. Эрсэн хүнээ олсон уу?

-Олоогүй ээ. Одоо ч хайгаад л явж байна.

-Танай гэр бүлийн хүн бас цагдаагийн алба хаагч гэсэн байх аа?

-Тийм ээ. Эхнэр Цагдаагийн ерөнхий газарт ажилладаг. Аав маань ч гэсэн цагдаагаар ажиллаж байсан.

Г.Алимаа