Хайлаастын уулзвараас Дарь-Эхийн зам хүртэлх 1.4 километр авто зам, 57 у/м гүүрийн барилгын ажил дуусч, ашиглалтад ороход бэлэн болжээ.

Шинэ замын зорчих хэсгийн өргөн 14 метр, дөрвөн эгнээ хатуу хучилттай, хоёр талдаа хоёр метр өргөн ногоон байгууламж, гурван метр өргөн явган хүний зам, гэрэлтүүлэг, борооны ус зайлуулах шугамтай юм.

Уг гүүр ашиглалтад орсноор Дарь-Эхийн зам болон Чингэлтэйн гудамжийг холбосон шинэ холбоос зам үүсч, хотын төвийг тойрсон гол гудамж болно.

Ингэснээр тухайн бүсийн авто замын түгжрэлийг 30 хувь бууруулж, хөдөлгөөнийг жигд хуваарилаж, гэр хорооллын дахин төлөвлөлтийг хурдасгах ачаа тээврийн үндсэн урсгалыг өнгөрүүлэх боломж бүрдэж байна. Авто замыг энэ сарын 30-нд ашиглалтад оруулах аж. Зам барилгын ажлыг “Мотор Сервис” ХХК гүйцэтгэжээ.

Эх сурвалж: НАЗХГ