Нийслэлийн Ерөнхий прокурор, хууль цаазын тэргүүн зөвлөх Д.Баярмагнай 2019 оны дөрөвдүгээр сард үүрэгт ажлаасаа өөрийн хүсэлтээр чөлөөлөгдсөн билээ. Түүнийг ажлаа өгснөөр хойш нийслэлийн Прокурорын газар удирдлагагүй зургаан сарын нүүр үзэх гэж байна. Тэгвэл энэ долоо хоногт багтаан нийслэлийн Ерөнхий прокурорыг томилох тухай шуум гарсантай зэрэгцэн хэн энэ албанд очих бол гэдэгт таамаг дэвшүүлээд эхэлжээ.

Хамгийн түрүүнд Улсын Ерөнхий прокурорын газарт хяналтын прокуророор ажиллаж байгаад Сүхбаатар дүүргийн Прокурорын газрын Ерөнхий прокуророор ажиллаж байгаа Д.Энхтөрийн нэр яригдаж эхэлсэн. Үүнээс гадна хэд хэдэн нэр яригдаж байгаа гэх мэдээлэл бий. Хэдийгээр яг баттай биш ч гэлээ, нийслэлийн Ерөнхий прокурорын орыг залгамжлах сунгаа хэдийнэ эхэлсэн, энэ долоо хоногт нэр батламжлах нь үнэн гэдгийг дээрх үйл явдал гэрчлэх шиг болов.

Нөгөөтэйгүүр, уг мэдээлэлтэй зэрэгцэн нийслэлийн Ерөнхий прокурор асан Д.Баярмагнайг Улсын Ерөнхий прокурорын газарт тушаал дэвшин ажиллахаар болсон гэх мэдээлэл цацагдсан юм.

Тиймээс энэ талаар Д.Баярмагнай прокуророос тодруулахад “УЕП-ийн Хэрэг эрхлэх газрын хяналтын прокуророор ажиллах тушаал гарсан нь үнэн. Гэхдээ яг одоогоор ажилдаа ороогүй байна. Тушаал дэвшсэн гэдэг мэдээлэл ташаа гэдгийг албан ёсоор хэлье. Харин ч хоёр шат доош буурсан. Би хууль цаазын тэргүүн зөвлөх хүн шүү дээ. Гэхдээ ингэлээ гээд би ямар нэгэн гомдол гаргаагүй. Тушаалыг хүлээж авсан” гэсэн юм.

Г.Нацаг-Эрдэнэ