Тагнуулын ерөнхий газрын дарга асан, хошууч генерал Б.Хурц, Улсын Ерөнхий прокурорын орлогч прокурор асан Г.Эрдэнэбат нарын есөн хүнд холбогдох шүүх хурал өнгөрсөн наймдугаар сард Төв аймгийн Сум дундын Эрүүгийн хэргийн анхан шатны шүүхэд болсон билээ. Шүүх хурлаас нэр бүхий есөн иргэнд холбогдох хэргийг нэмэлт мөрдөн байцаалтад буцаасан. Хуулийн дагуу шүүхийн тогтоолыг гардаж авснаас хойг 14 хоногийн дотор прокурор эсэргүүцэл бичих эрхтэй байдаг. Тэгвэл уг хуулийн дагуу өнөөдөр буюу энэ сарын 5-ны өдөр нийслэлийн прокуророос шүүхийн тогтоолтой холбогдуулж эсэргүүцэл бичжээ.

Прокурор дээрх хэрэгт эсэргүүцэл бичсэнээр талууд Төв аймгийн сум дундын давж заалдах шатны шүүхээр маргаж, хэргийг шийдвэрлэх юм байна. 

Хэргийг нэхэн сануулбал, төр, нийгмийн зүтгэлтэн С.Зоригийн амь насыг хөнөөсөн хэрэгт буруутгагдаж, ял эдэлж буй ялтан Б.Содномдаржаа, Т.Чимгээ нарын хэргийг шалгах явцдаа эрүүдэн шүүсэн үндэслэлээр дээрх есөн иргэнд хэрэг үүсгэсэн юм.  

Шүүх хуралд хохирогчоор ялтан Т.Чимгээ, Б.Содномдаржаа болон талийгаач С.Зоригийн гэргий Б.Булган нар оролцсон бол ялтан Ц.Амгаланбаатарыг гэрчээр оролцуулсан юм. 

Шүүх хурлын үеэр ТЕГ-ын дарга асан Б.Хурц эрүүдэн шүүх тушаал өгөөгүй гэж мэдэгдсэн бол Улсын Ерөнхий прокурорын орлогч прокурор асан Г.Эрдэнэбат "Ийм зүйл болсныг мэдээгүй. Хэрвээ буруутай бол хариуцлага хүлээхэд бэлэн. Т.Чимгээ болон Б.Содномдаржаа нарыг С.Зоригийн амь насыг хөнөөсөн хэрэгт буруутай болох нь олон баримтаар нотлогддог" гэсэн юм. 

Г.Алимаа