Герман Улсын хилээр их хэмжээний эм нэвтрүүлэх гэж байгаад баригдан шалгагдаж буй иргэн Т.Мөнхбат, Э.Оргил нарын шүүх хурал үргэлжилж байна. Үүнтэй зэрэгцэн иргэн Т.Энхсайхан нь Хууль зүй, дотоод хэргийн сайд Ц.Нямдорж, түүний хүү, Гадаад харилцааны яамны Төрийн захиргааны удирдлагын газрын захирал Н.Анхбаяр нар Т.Мөнхбатыг Улаан-Үдэд дипломат ажилтнаар томилсон, Н.Анхбаяр нь Т.Мөнхбатад "Lexus-570" автомашин оруулж ирэх чиглэл өгч, Хууль зүйн яаманд шахсан зэрэг мэдээллийг удаа дараа хийж, жагсаал цуглаан зохион байгуулсан юм. Н.Анхбаяр, Хууль зүй, дотоод хэргийн яамнаас иргэн Т.Энхсайханы мэдээллийг эрс няцааж буй. Мэдээллийг тэнцвэртэй хүргэх үүднээс Т.Мөнхбатын том хүү М.Содбилэгээс тодруулга авснаа хүргэе.

-Танай аав Т.Мөнхбат Улаан-Үдэд дипломат ажилтнаар томилогдсон, Гадаад яамны ажилтан хүн үү?

-Сүүлийн үед аавын талаар үндэслэлгүй мэдээлэл гарч байна. Миний аав хувийн хэвшилд ажиллаж байгаад 2017 оны намраас Монголын худалдааны танхимын Улаан-Үд дэх төлөөлөгчөөр ажиллах болсон. Гадаад яаманд ажиллаж байгаагүй.

-Та аавтайгаа холбоотой байгаа юу?

-Бид холбоотой байгаа. Сая тантай уулзахаас өмнө би өмгөөлөгчөөр нь дамжуулж ярьсан.

-Иргэн Т.Энхсайхан танай аавыг Хууль зүй, дотоод хэргийн сайд Ц.Нямдорж, түүний хүү Н.Анхбаяр нар томилсон, хар тамхи зөөлгөдөг. Lexus 570 автомашин оруулж ирэхийг даалгаж, энэ машиныг Хууль зүйн яаманд шахсан зэрэг мэдээллийг хийж байна. Үнэхээр ийм зүйл байгаа юм уу?

-Манай гэр бүлийн амьдралын хүнд хэцүү үед аавын талаар иймэрхүү үндэслэлгүй, бас улстөржсөн маягтай мэдээллүүд гараад байгаа учраас би танд тодруулга өгөхийг зөвшөөрсөн юм. Миний мэдэхийн аав Улаан-Үдэд Худалдаа, аж үйлдвэрийн танхимын төлөөлөгчөөр л ажиллаж байсан. Ц.Нямдорж сайд, хүү Н.Анхбаярыг нь манай гэр бүлийнхэн танихгүй. Аавыг томилоход нөлөөлөөгүй. Манай аав баригдах үедээ юу авч явснаа ч мэдээгүй гэж надад хэлсэн. Би аавдаа итгэж байна. Аавын импортоор оруулж ирсэн "Lexus-570" автомашиныг хувь хүнд зарсан. Хууль зүй, дотоод хэргийн яаманд зараагүй. Яах гэж ийм үндэслэлгүй мэдээлэл тарааж байгааг мэдэхгүй байна.

Улстөрчтэй холбож байхыг бодоход цаанаа өөр зорилготой юм болов уу гэж харах юм.

Олон нийтээс хүсэхэд үндэслэлгүй мэдээлэл битгий түгээгээч гэж хүсмээр байна. Ядаж гэр бүлийг минь жаахан ч гэсэн бодооч гэж хүсэх юм. Миний аавын хэрэг шалгагдаад нэг тийшээгээ болох л байх. Ийм хэцүү үед аавын талаар янз бүрийн худал мэдээлэл тараахаар  их хүндрэлтэй юм. Бидний хувьд хэрэг нь хурдан шийдэгдээсэй. Бие хаа нь эрүүл байгаасаа л гэж бодож сууна. Энэ мэт гүтгэлэг даамжирвал хууль хяналтын байгууллагад ханддаг ч юм билүү гэж бодож байна.

Г.Нацаг