Автозамын ачааллыг буурах зорилгоор хэт ойрхон явган хүний гарцуудыг цөөлж эхэлсэн байна. Тодруулбал, уг саналыг Тээврийн цагдаагийн алба болон холбогдох байгууллагуудаас гаргасан саналыг үндэслэн хийж байгаа аж.

Тухайлбал, Саппоро, 21 дүгээр хороолол, 25 дугаар эмийн сан, ТБД андууд, Арслантай гүүр, Бөхийн өргөө, Хүнсний-1, Монгол Улсын консерватори зэрэг газруудын явган хүний гарц хэт ойрхон байрлалтай юм байна. Үүний улмаас замын хөдөлгөөний ачааллыг нэмэгддэг тул зарим газрын явган хүний гарцыг нүүлгэн шилжүүлж, засах ажлыг нийслэлийн Замын хөдөлгөөний төлөвлөлт, зохицуулалт инженерчлэлийн газар, Нийслэлийн Авто замын хөгжлийн газар, Улаанбаатар авто зам засвар арчлалтын компани хамтран хэрэгжүүлж байна.

Ташрамд дурдахад, Улаанбаатар хотод ойролцоогоор 400 гаруй явган хүний гарц байдаг. Үүнээс явган зорчигчийн хөдөлгөөний аюулгүй байдлыг хангасан явган хүний гүүрэн болон нүхэн гарц есөн, гэрлэн дохиотой явган хүний гарц 46 байдаг аж.