Үндсэн хуульд нэмэлт өөрчлөлт оруулах тухай хуулийн төслийн хоёрдугаар хэлэлцүүлгийг УИХ-ын ээлжит бус чуулганаар хэлэлцэж дуусан. Үүнтэй холбогдуулан тус хуульд нэмэлт, өөрчлөлт оруулахад ард нийтээр санал асуулга авахаар болсон. Гэвч санал асуулгад зарцуулах төсвийг хаанаас гаргах вэ гэдэг асуудал тулгараад байгаа юм. Тодруулбал, Засгийн газраас уг төсвийг гаргахаар болсон ч энэ нь ямар ч боломжгүй гэдгийг ЗГХЭГ-ын дарга Л.Оюун-Эрдэнэ Төрийн байгуулалтын байнгын хорооны хуралдаанаар мэдэгдсэн юм.
Харин МАН-ын бүлгийн дарга Д.Тогтохсүрэн “Засгийн газраас гаргах бүрэн боломжтой” гэдгийг өнөөдөр мэдэгдсэн.
Тэгвэл Л.Оюун-Эрдэнэ сайд “Үндсэн хуульд нэмэлт, өөрчлөлт оруулах хуулийн төсөлд ард нийтээс санал авах ёсгүй. Учир нь хуулийн төслийн хоёрдугаар хэлэлцүүлэг нэгэнт дууссан. Хэрвээ санал асуулга авах байсан бол үүнээс өмнө урьтаж авах ёстой байсан. Нэг үгээр хэлбэл, галт тэрэг нэгэнт хөдөлсөн. Түүнчлэн санал асуулгад зарцуулах төсвийг Засгийн газраас гаргах ямар ч боломжгүй.
Учир нь нөөц хөрөнгө хүрэлцэхгүй.
Мөн Үндсэн хуулийн цэцийн дүгнэлт гарсан. Энэ нь нөхөн сонгуультай холбоотой болон Үндсэн хуульд нэмэлт өөрчлөлт оруулах төсөлд ард нийтээс санал асуулга авах зардлыг Засгийн газраас гаргах нь хууль зөрчсөн үйлдэл гэсэн дүгнэлт гаргасан. Гэтэл УИХ-ын Тамгын газраас хууль зөрчихгүй гэдгээ өмнөх гаргаж байсан шийдвэрүүдээрээ тайлбарлаж байна лээ. Засгийн газрын зүгээс Цэцээс гаргасан дүгнэлтийг албан бичгээр авч танилцсаны дараа шийдвэр гаргана. Энэ асуудал шийдэгдэх байх. Байнгын хорооноос “Холбогдох хууль тогтоомжид нийцүүлэн шаардлагатай санхүүжилтийг олгох тухай” гэж ерөнхий байдлаар шийд гаргасан.
Үндсэн хуульд том, жижиг өөрчлөлт гэж байхгүй. Японд ганцхан заалт өөрчлөхийн тулд 12 жил хэлэлцсэн.
Ард нийтээрээ хэлэлцэх ёстой юу гэвэл хэлэлцэх ёстой. Гэхдээ хөрөнгө мөнгөтэй холбоотой асуудал бий. Үүнийг зохицуулах байх. Учир нь зөвхөн өнөөдөр, маргаашийг шийдэх бус бүзхэл бүтэн улсын ирээдүйг тодорхойлох хууль учраас тэр. Нэгхэн үг өөрчлөгдөхөд л улс эх орны, хувь хүний ирээдүй яригдана" гэлээ.
Сэтгэгдэл (4)