“Хэл, хил, мал гуравтайгаа хэн баян бэ, Монгол баян”... гэсэн эрхэм үгийн үнэ цэн өдгөө алдагдаж, ашиг хонжоо олж болохоор л бол хэнд, хэдэн төгрөгөөр юугаа ч хамаагүй солиход бэлэн болсон цаг иржээ. Үүнийг нь ч батлах мэт хятад улсын иргэд Монгол орны өнцөг булан бүрт уул уурхай, газар тариалан, мал аж ахуйн салбарт бизнес эрхлэж байна. Хамгийн гол нь тэдгээрийн олонх нь хуулийн дагуу бус, харин хэн нэгэн эрх мэдэлтнийг хахуулдах байдлаар хууль бусаар бизнес эрхлэж байгаад иргэд дургүйцэж буй.

Хамгийн сүүлд гэхэд Сэлэнгэ аймгийн хэд хэдэн суманд хятад иргэд зөвшөөрөлгүй алт олборлож байсныг иргэний хөдөлгөөнийхөн илрүүлэн хууль хяналтын байгууллагад хандсан юм. Цагдаагийн байгууллагаас шалгахад уул уурхайн олборлолтын зөвшөөрөл аваагүй, тоног төхөөрөмжийг зөвшөөрөлгүй сууриллуулсан, байгаль орчныг сүйтгэсэн зэрэг томоохон зөрчил илэрсэн байдаг.

Ийнхүү “Толгойгүй төр”-ийн балгаар харийн иргэд Монгол орныг ухаж, сэндийчэж байна. Гэвч төр нүдээ аниж, чихээ дарсан хэвээр л.

Тэгвэл яг энэ цаг дор Сэлэнгэ аймагт бас нэгэн хэрэг мандаад байна. Энэ нь аймгийн нэр бүхий удирдлагууд БНХАУ-ын иргэдэд 300 га газрыг 60 жилийн хугацаатай эзэмших зөвшөөрөл олгосон гэх асуудал. Үүн дээр 350 орчим га газар дахин “шилжүүлж” авах гэж байгаа гэх мэдээллийг тус аймгийн иргэд манай сайтад хандан мэдээллэсэн юм. Тодруулбал, хятад улсын иргэд Сэлэнгэ аймгийн Шаамар суманд газар тариалан эрхлэхээр 300 га газар авсан байна. Үүний дараа иргэдийн нэр дээрх газрыг өөрсдөдөө шилжүүлэх авах замаар газрын хэмжээгээ томсгож байна гэсэн юм. Дээрх олгосон газар нь 1980-аад оны үед тариа тарьж байсан атаршсан газар ажээ.

Бид энэ талаар тун удахгүй сурвалжилж та бүхэнд хүргэх болно.

Г.Эрдэнэ