Эхнэрийнхээ амийг хөнөөж, автомашинтай нь шатаасан хэргийн талаарх мэдээлэл цацагдсан билээ. Тэгвэл уг хэргийг нөхөр нь бус өөр этгээд үйлдсэн болохыг цагдаагийн байгууллагаас урьдчилан тогтоосон байна.
Тодруулбал, Говь-Алтай аймгийн цагдаагийн газарт энэ сарын 3-ны өдрийн 11.45 цагт “Манай хамаатан Б-нь өөрийн нөхөрт энэ сарын 2-ны өдөр шатахуун хүргэж өгөөд буцсан. Гэтэл түүнээс хойш сураггүй алга болсон” гэх дуудлага ирсэн байна.
Уг дуудлагын дагуу тус аймгийн Есөнбулаг сум Наран багт очин үзлэг шалгалт, эрэн хайх ажлыг зохион байгуулжээ. Улмаар энэ сарын 4-ний өглөө сураггүй алга болсон иргэн автомашинтайгаа шатаж нас барсан байдалтай олдсон байна. Мэдээллийн дагуу аймгийн цагдаагийн газар, Эрүүгийн цагдаагийн албаны Хүнд гэмт хэрэгтэй тэмцэх хэлтсийн алба хаагчдын хамтаар ажлын хэсэг гарган ажиллажээ.
Шалгалтаар иргэн ”Б” нь 2019 оны есдүгээр сарын 2-ны өдөр хээр машины шатахуун дуусч зоссон нөхөртөө шатахуун хүргэж өгөөд буцаж явах замдаа 1995 онд төрсөн, бүрэн дунд боловсролтой, барилгын засал чимэглэлийн мэргэжилтэй, Говь-Алтай аймгийн Есөнбулаг суманд айлын мал малладаг “Б” гэгчтэй тааралдсан байна. Улмаар уг этгээд хохирогчийн амь насанд халдаж, галдан шатаасан болох нь урьдчилсан байдлаар тогтоогджээ. Хэргийг ямар шалтгааны улмаас үйлдсэн болохыг аймгийн цагдаагийн газраас үргэлжлүүлэн шалгаж байна. Уг хэргийг үлдсэн гэж сэрдэгдэн цагдан хоригдсон этгээд нь өмнө нь 2019 оны дөрөвдүгээр сард Говь-Алтай аймгийн Говь-Алтай аймаг дахь сум дундын шүүхээр танхайн хэргээр торгох ялаар шийтгүүлж байжээ. Уг хэрэгтэй холбогдуулан хэвлэл, мэдээллийн хэрэгслээр нөхөр нь эхнэрийнхээ амь насанд хүрсэн гэж ташаа мэдээлэл гарч байсны залруулж байна.
Сэтгэгдэл (7)