Үндсэн хуулийн цэцэд Тагнуулын ерөнхий газрын дарга Д.Гэрэлийн томилгоотой холбоотой мэдээллийг иргэн Ш.Амгалан гаргажээ. Түүний мэдээлэлд Засгийн газраас 2017 оны арваннэгдүгээр 1-нд гаргасан тогтоол нь Үндсэн хуулийн 45.1 дэх хэсгийг зөрчсөн хэмээн үзсэн байна. Гэвч иргэн Ш.Амгалангийн энэхүү мэдээлэл Цэцийн гишүүн Н.Чинбатад хуваарилагдсанаар холбогдох хариуг нь өгч буцаажээ. Ингэхдээ Тагнуулын ерөнхий газрын даргыг томилсон томилгооны асуудлаар Цэцэд хандахаас өмнө Засгийн газар болон УИХ-д хандсан байх нөхцөлийг хангаагүй тохиолдолд мэдээллийг хүлээн авах боломжгүй гэж үзжээ.

Энэ дагуу иргэн Ш.Амгалан УИХ, Засгийн газарт Тагнуулын ерөнхий газрын томилгоотой асуудлаар албан бичиг явуулжээ. Улмаар УИХ, Засгийн газраас хуулийн хугацаанд хариу өгөөгүй учир дахин Цэцэд мэдээлэл хүргүүлэхээр хандсан байна.

С.Сүлд