Энэ сарын 11-ний өдөр 16.00 цагийн орчимд дөрвөн иргэнийг хутгалж, хүнд гэмтээсэн онц ноцтой хэрэг гарсан байна. Тодруулбал, Сонгинохайрхан дүүрэг дэх Цагдаагийн хоёрдугаар хэлтсийн Шуурхай удирдлагын жижүүрийн утсанд иргэнээс “Манай нөхөр хутгаллуулчихсан гаднаас ороод ирлээ” гэсэн дуудлага иржээ.

Дуудлагын дагуу “Ачит 118” чиглэлд үүрэг гүйцэтгэж байсан алба хаагчид хэргийн газар шуурхай очиж шалгахад Сонгинохайрхан дүүрэгт оршин суух иргэн Н гэгч эрэгтэй архидан согтуурсан үедээ зүс таних иргэн Ц гэгчтэй гудамжинд тааралдан маргалдсан байна. Улмаар архины шилний хагархайгаар хүзүү тус газарт нь зүсжээ.

Үүнийхээ дараа гэртээ орж хутга авч гаран гудамжинд явж байсан 53 настай иргэн Б, 49 настай иргэн Э, 36 настай иргэн Н нарыг ямар ч шалтгаангүйгээр хутгалж, гэмтээсэн байна. Дээрх гэмт этгээдийг цагдаагийн байгууллагаас эрэн сурвалжилж байна.

Г.Эрдэнэ