Сэлэнгэ аймгийн Шаамар сумын нутагт 300 га газрыг Хятадуудад олгосон тухай мэдээлэл гарч, нийгмийн сүлжээгээр нэлээдгүй шүүмжлэл дагуулсан билээ. Уг мэдээллийн дагуу манай сайтын сурвалжлах баг, газар дээр нь очиж тухайн мэдээлэл үнэн, худал эсэхийг тодрууллаа. Бид энэхүү мэдээллийн дагуу очиж сурвалжлах явцдаа Сэлэнгэ аймгийн Шаамар сумын Засаг даргын орлогч Т.Өлзийжаргалаас дараахь тодруулгыг авсан юм. Угтаа бол сумын Засаг дарга М.Баярбаатар нь эл шийдвэрийг гаргасан ч орлогчоор нь ажиллаж байсан тэрбээр иргэдээс ирүүлсэн санал гомдлын дагуу даргадаа санал гаргасан ч “Миний эсрэг явлаа” хэмээн жавтий хүртээжээ.

-Таныг одоогоор ажлаа хийхгүй байгаа гэж сонслоо...

-Би сумын Засаг даргын орлогч, хажуугаар нь ИТХ ажилладаг. 300 га гээд байгаа энэ газарт дөрвөн жил багийн Засаг дарга хийж байсан. Өнгөрсөн сонгуулиас хойш сумын Засаг даргын орлогчоор ажиллаж байна. 300 га газрын талаар яагаад малчидтайгаа хамт яваад байна бэ гэхээр бэлчээрийн тухай асуудал. Ийм шийдвэр гаргаснаар малчдын эрх ашиг маш их зөрчигдөж байгаа. ИТХ-ын төлөөлөгчтэйгөө уулзаад та нар бодит газар дээр нь очиж хараач ээ, газрыг хагалж байна очъё гэсэн санал тавихад “Миний эсрэг явлаа, нэр хүндэд нөлөөллөө” гэдэг утгаар Засаг дарга М.Баярбаатар маш их уурлаж намайг хавчиж шахаад ажил хийхэд үнэхээр хэцүү байдалд оруулчихлаа. Миний хувьд ямар нэгэн ашиг сонирхол хөөгөөгүй ээ. Малчдыг малын бэлчээртэйгээ үлдээсээ гэдэг дээр л явсан. 

-Нутгийн иргэдээс сонсох нь ээ таны гэр орон шатсан гэж ярьж байна лээ?. Энэ үнэн үү?

-Тийм ээ. Энэ оны гуравдугаар сард тийм асуудал үүссэн. Цахилгааны гэмтлийн улмаас манай гэр шатсан.

-Одоо хаана амьдарч байгаа бэ?

-Эмээгийнхээ байшинд дөрвөн хүүхдийнхээ хамт амьдарч байгаа.

-Таны гэрийг шатсаны дараа хавь ойрын хүмүүс ч юм уу, сумын удирдлагаас ямар нэгэн тусламж үзүүлсэн юм болов уу?

-Ажлын газраас болон ойр дотны хүмүүс тусламж үзүүлсэн. Гэхдээ би хэн нэгнээс надад туслаач гэж яваагүй ээ. Одоогоор эмээгийнхээ байшинд дөрвөн хүүхдийнхээ хамт толгой хорогдож байна.

-Хятадуудад газар олгосон гэх асуудлыг эсэргүүцсэний дараа таны цалинг хоёр сар өгөөгүй гэсэн?

-Үнэн үнэн. Та нар сумын захиргаа руу ороод хараарай. Бүх өрөөний хаалган дээр тухайн хүний албан тушаал, нэр байгаа. Харин минийхийг аваад хаячихсан байна лээ. Өнгөрсөн зургаадугаар сараас хойш ийм байдалтай болсон.

Б.Жаргал